– Virus lea balddáhallan min guhká ja dál leat šaddan dán dillái

Duorastaga eahkedis dieđihii Kárášjoga gielda, ahte gielddas lea duođaštuvvon Covid-19.

Sátnejođiheaddji Svein Atle Somby muitala NRKii ahte lea sáhka guovtti olbmo birra geain lea virus. Njoammunguorahallan čájeha ahte njoammun lea boahtán Hámmerfeasttas.

Áltá ja Girkonjárga leat maid guorran njoammuma Hámmerfestii.

Somby muitala ahte gielda bargá garrasit oažžut oppalašgova dilálašvuođas.

– Mii leat hui govdadit bargan jo ievttá eahkedis. Ikte eahkes čađahuvvo 50 iskosa lagasoktavuođain, ja bearjadaga leat gis čađahan 70, dadjá Somby.

Ovddasguvlui dáhttu sátnejođiheaddji ahte olbmot garvet galledemiid ollu ja gáržžidit sosiála oktavuođa.

– Dat livčče deháleamos dán dahkat ja maiddái váldit iskosa jus leat dávdamearkkat, dadjá Somby.

Loga maid: Regjeringen fortsetter åpningen av landet fra 27. mai

Maŋidit vuot konfirmašuvnnaid

Dilálašvuohta dagaha maiddai ahte gielda ferte olu gáržžidemiid bidjat johtui.

– Mii dieđusge šluhttet buot doaluid mat leat plánejuvvon, earret go mánáid hárjehallamiid, dadjá Somby.

Dán vahkkoloahpa galge maiddai leat doalut girkus.

– Vahkkoloahpas galge leat konfirmašuvnnat, muhto dat eai dál dieđusge šatta, dadjá Somby

Somby čilge ahte gildii lea dát duođalaš dilli, muhto deattuha ahte ii leat gean ge sivva.

– Nu mo mun lean ádden de leaba dát guovttos váldán iskosa go bođiiga, ja válddiiga ođđa iskosa go buohccáiga. Nu ahte soai leaba dahkan dan maid galggaiga dahkat, dadjá Somby

Sátnejođiheaddji muittuha maiddai ahte gielda lea čuvvon buot doaibmabijuid maid ráđđehus lea bidjan.

– Mun gal oaivvildan ahte mii gieldda bealis leat beroštan dán dávddas čađat, mii hal gal maid čuovvut dan maid ráđđehus dáhttu. Dás ii leat oktage gii lea lobihuššan, dadjá Somby.

Loga maid: Ungdomsfest rett før koronautbrudd: – Viser hvorfor unge bør vaksineres først

Loga maid: Hammerfest-smitten sprer seg i Nord-Norge

– Buorre go ii geavvan márkanolbmuiguin

NRK lea ožžon ollu cavgilemiid ahte njommojuvvon olbmot leaba leamašan mielde boahkuheame gieldda ássiid. Dáidda čuoččuhusaide lea gieldadirektevrras, Kurt Maurstadas garra vástádus.

– Dát ii doala deaivása, eaba ge leat leamašan doppe obanassii.

Maurstad čilge ahte studeantta guoktás ii leat leamašan mihkkege dahkamušaid boahkuhemiin, muhto ahte leaba leamašan barggus buhcciidruovttus.

– Soai leaba leamašan dearvašat ja dávdamearkkaid haga duorastaga ijá rádjái, ja danin mii leat ge iskan buot bargiid ja sin geat orrot buhcciidruovttus.

Maurstad lasiha maiddai ahte boarrásat buhcciidruovttus leat ollásit boahkuhuvvon.

– Dien dáfus lei buhcciidruoktu kánske buoremus sadji gos sáhtii boahtit dat njoammun. Njommojuvvon olbmot leaba fitnan hui uhcán eará olbmuid siste ja leaba measta beare leamašan bargosajis.

Seammás dadjá ahte ii leat heađisge buorre go olbmot buohccájit, muhto dilli lea veaháš buoret go ná smiehttá.

Duođalaš dilli

Kurt Maurstad muitala ahte gielda lea dál geargan njoammunguorramiin Kárášjogas, ja leat addán dieđuid viidáseabbo Hámmerfestii geat jotket guorramiin.

– Mii leat čađahan sihke jođánisiskosiid ja PCR-iskosiid, iskosat sáddejuvvoje Romsii bearjadaga ja lávvardaga de oažžut vástádusa leat go eambbo njoammumat.

Maurstad dadjá maid ahte dilli livčče soaitit vearrát jus livčče márkanolbmui njoammut, go livčče váddáseabbo diehtit geaiguin sii leat ovttastallan ja gos sii lea fitnan.

– Dieđušge mii fertet leat várrogasat dássážii go diehtit sihkkarit mo dilli lea, muhto ii leat dárbu suorganit ja ballát ja steŋgegoahtit skuvllaid.

Svein Atle Somby lea čielggas dainna ahte ii galggašii smiehttat nu ollu manin Kárášjohka lea šaddan dán dillái, go dat sáhttá leavvat vaikko gosa ja geasa.

– Korona lea balddáhallan min guhká ja dál leat šaddan dán dillái, ja doaivumis beasašeimmet eret dás buoremus lági mielde.