Deanučázádaga guolástanhálddahusa (DG) nubbijođiheaddji mielas eai berre dákkár vuogit dohkkehuvvot. Larsen oaivvilda ahte Deanu-soahpamuš mii heiveha luossabivddu Deanučázádagas sihke Norgga- ja Suoma beale rájá, ferte dárkkistuvvot ođđasit.
- Loga:
Larsen oaivvilda ahte Deanu-soahpamušas daddjo čielgasit ahte ii leat lohpi vuovdit oaggunkoarttaid earáide. Son diehtá vissásit ahte muhtin eanaoamasteaddji dinii 8000 euro diibmá. Dietnasa árvu lei 80 000 Norgga kruvnnu.
Larsen muitala maid ahte oaggunkoarttat vuvdojedje Suoma turisttaide.
Ii oktage Ohcejoga gielddas, gos NRK lea gulaskuddan, mieđit dahje duođaš dan maid Larsen diehtá. Dattetge leat Suoma guovddášeiseválddit mieđihan ahte priváhta olbmot leat vuovdán oaggunkoarttat earáide.
Loga:
Norgga eiseválddit cuiggodit
Norgga Birasdepartemeanta lea cuiggodan aiddo dán. Muhtin breavas čállá departemeanta ahte dát rihkku Deanu-soahpamuša njuolggadusaid.
– Sin mielas lea buorre go Suoma eiseválddit leat dieđihan ahte dát galgá loahpahuvvot, čállá departemeanta.
- Dá lea ášši dárogillii:
Breavas deattuhuvvo maid ahte oaggunkoarta lea persovnnalaš dokumeanta man ii sáhte vuovdit earáide.
Geassemánu 15. beaivve álgiba Norga ja Suopma fas šiehtadallet.
– Sin mielas fertejit dárkkistit Suoma turisttaid bivdinvejolašvuođaid. Ođđa njuolggadusaid vuođul ožžo sii eanet bivdináiggi, ja dát ii leat vuoiggalaš báikki olbmuid hárrái, dadjá Benn Larsen.