– Ulmme la TDMSa ájálvis

STH-nammadus, mij la Nuortta-Sállto suohkanoajve ja rádeålmåj, lidjin iektu aktan sámeájrrasij Strávvásjnjunjen Hábmerin tjoahken avtaárvvusasj varresvuodafálaldagáj birra dágástallat.

– Buorre tjåhkanibme lij iektu. Ålov ságastijma ja lij buorre dágástallam, valla ep la ájn ållu guorrasam gåsi galggap ja majna barggat. Dan birra vijddásappojt galggap ságastit boahtte tjåhkanimij gå vat æjvvalip, subtsas sáme ájrras ja Sálto Sámesiebre jådediddje Hugo Kalstad.

Dát tjåhkanibme lij stekkan nav vaj álmmuk ja media ettjin besa tjåhkanimev tjuovvot.

– Ulmme la TDMSa ájálvis

Akta máhttelis tjoavddus dán ássjáj le guovlomedisijnalasj guovdátjav (TDMS) tsieggit Ájluovtan Divtasvuonan. Jur dát la sáme ájrrasij mandáhtta Sámedikkes.

– Mijá ulmme la TDMSa ájálvis. Jus ep joarke TDMS-prosjevtajn, de ájálvisájn joarkkep vaj lágásj tjoavddusav gávnnap, javllá Kalstad.

– Lihpit gus TDMSa lágásj tjoavddusav gávnnam?

– Ep la nav guhkás jåvsådam, valla lip guorrasam prosessajn joarkket vaj dåk jåvsådip. Sávvap dåk jåvsådip vaj sáme dán bájken avtaárvvusasj varresvuodafálaldagáv oadtju.

– Avtaárvvusasj varresvuohta lij tiebmá

STH-nammadusá jådediddje ja Divtasvuona suohkanoajvve Tor Asgeir Johansen subtsas avtaárvvusasj varresvuohta lij tiebmá ævtásj tjåhkanimen, ja tjåhkanime duogásj lij TDMS-prosjækta mij Divtasvuonan dijmmá hiejteduváj.

– Dan maŋŋela lip Sámedikkijn tjåhkanam dålå birra gånnå sjiehtadijma joarkket dágástallamav avtaárvvusasj varresvuoda birra, gåktu buoremusát dáv tjoavddet.

• Lågå aj: Bålmøte tente gnisten

Sån diedet ådå tjåhkanibme vat sjaddá máno duogen, moarmesmáno maŋegietjen jali biehtsemáno álgon.

– Iektu lij buorre tjåhkanibme gånnå dágástalájma gåktu bargujn joarkket.

– Joarkkebihtit gus TDMSa bargujn?

– TDMSa ájádus la avtaárvvusasj varresvuodadievnastusá. Divtasvuona suohkan la prosjevtav hæjttám, valla åvddålijguovlluj tjalmostip avtaárvvusasj varresvuodadievnastusájt.