Kjøpte gardsbruk på Finn i heilt framand bygd: – Vi skal ikkje flytte, då?

I mange år har ein kunne lese nyheitssaker om at det blir færre og færre bønder.

Ikkje nødvendigvis fordi dei ikkje vil vere bønder, men fordi det har blitt vanskelegare å leve av yrket.

Éin som derimot ikkje har late seg skremme av det, er Asgeir Presttun frå Osterøy utanfor Bergen.

No har han endeleg fått kloa i ein eigen gard, saman med sambuaren Amalie Bakkebø. Og garden ligg på ein stad ingen av dei hadde noka tilknyting til frå før.

– Eg har alltid ville vore bonde, heilt sidan eg var tre år. Eg såg denne garden ute på Finn, og då sa eg til Amalie: «Vi skal ikkje flytte til Syvde, då?», seier han og ler.

Og Syvde blei det. Ei lita bygd i Vanylven på Søre Sunnmøre som var heilt ukjent for dei.

No spørst det om økonomien vil tillate dei å bli verande.

Men den unge bonden meiner kvardagen til bøndene kunne ha vore mykje tøffare enn han er i dag.

• Anna-Victoria (14) den store draumen sin er å bli bonde, men ho er redd det aldri vil gå.

Masterstudent, heiltidsjobb og gardbrukar

Det unge paret dreiv tidlegare ein gard i Osterøy, men fekk ikkje kjøpe den. No, på den nykjøpte garden på Sunnmøre, har dei fleire mjølkekyr, ungdyr og storfe. Dei planlegg også å skaffe seg sauer.

Presttun meiner det tøffaste med å vere bonde er det økonomiske.

– Men vi har ikkje nokon andre enn oss sjølve å forsørge. Vi har ikkje ungar eller noko sånt. Men eg har sagt at eg har sakna ein jobb utanom, inntektsmessig.

Ein ekstra jobb krev derimot at ein har tid til det, og det understrekar Presttun at han ikkje har.

Og nettopp det er også vanskeleg for sambuaren hans. Ho er masterstudent, jobbar heiltid i ein barnehage – og så kjem gardsdrifta i tillegg.

– Eg skulle ønske det var 30 timar i døgnet i staden for 24, seier Bakkebø og ler.

• Bonde Kari Raanes er usikker på om ungane hennar bør gå same veg som henne; altså satse på landbruk.

Snart startar forhandlingane

Den siste tida har fleire bønder aksjonert fram mot jordbruksoppgjeret.

Eit oppgjer som av bøndene blir skildra som historisk viktig.

Om kort tid startar også forhandlingane i jordbruksoppgjeret i år, nærare bestemt 18. april:

Bøndene protesterer mot lønsnedgangen, og meiner at regjeringa opererer med feil talgrunnlag. I fjor sa ein at bønder tener 481.000 kroner per årsverk, noko bøndene seier er langt unna verkelegheita.

I midten av juni skal Stortinget vedta jordbruksavtalen.

– Steintøffe tider

Ordføraren i kommunen har også tatt turen på garden til det unge paret. Han er mektig imponert og glad for valet dei har tatt.

– Eg synest det er kjempetøft gjort av dei. Eg set stor pris på at dei faktisk kjøper ein gard som er til sals i Vanylven og torer å satse på det, seier Paul Sindre Vedeld (Sp).

Som Senterparti-ordførar engasjerer han seg i landbruket, og meiner det avgjerande for framtida at fleire kan og vil satse.

– Det er steintøffe tider i landbruket. At ungdom torer å gå inn i det på denne måten er veldig bra. Det er viktig, seier Vedeld.

Men den nye gardseigaren Presttun meiner det kunne ha vore tøffare for bøndene – sjølv om han meiner politikarane no kunne ha gjort meir.

– Eg trur mange bønder rundt om, som ikkje nødvendigvis er engasjert politisk, veit at det kunne ha vore forferdeleg mykje verre, seier han.