– Det skal vere ein plass for alle
Denne helga opna Kirkens Bymisjon det nye Bymisjonssenteret i lokala til den gamle metodistkyrkja i Ålesund. Der vil det vere ein kafé, som er open i vekedagane, og det vil også bli arrangert temakveldar, konsertar, kurs og samlingar. Leiar for bymisjonssenteret, Anne Karin Zeitz, er glad for den store interessa som har vore så langt. – Det har vore over all forventning. Dette skal vere ein møteplass for heile byen og eit tilbod for absolutt alle. Det skal vere ein plass der alle kan føle seg trygge. Vi ønsker også halde ope når alle andre har stengt, som i høgtider, feriar eller på 17. mai, seier Zeitz. Frivillig, Eva-Brit Langva, håper at dei greier å skape ein god atmosfære der alle blir sett. – Dette vil vere den plassen i byen som motverkar utanforskap, seier ho. Frå venstre: Carolin Urke (kafé leiar) og Anne Karin Zeitz og Eva-Brit Langva.
