Tal frå SSB viser at Møre og Romsdal er det einaste fylket som hadde nedgang i folketalet i løpet av 1. kvartal i år. Møre og Romsdal og Vest-Agder var også dei einaste fylka som ikkje har hatt nettoinnflytting, altså færre innflyttingar enn utflyttingar, så langt i år.
– Det er urovekkande når tala viser ein befolkningsnedgang. Det er eit brot med den utviklinga vi har sett dei seinare åra, seier Ingunn Bekken Sjåholm, assisterande fylkesplansjef.
- Les også:
Auka arbeidsløyse
Bekken Sjåholm trur den auka arbeidsløysa som har prega fylket den siste tida kan vere blant årsakene til nedgangen.
– Arbeid er viktig for kvar folk vel å busetje seg. Møre og Romsdal har lenge vore bortskjemt med lågare arbeidsløyse enn resten av landet, men slik er det ikkje lenger, seier ho.
Skuggane ligg tunge over mange arbeidsplassar i Møre og Romsdal i desse dagar. Somme fryktar permitteringar og oppseiingar, andre har alt gått ut døra til arbeidsplassen for godt. Statistikk viser at arbeidsløysa i fylket er den høgaste på 10 år.
– Vi ser at det er mange som får oppseiingar, og at det er utfordrande tider i delar av næringslivet. Det er klart at det påverkar kor attraktive vi er å flytte til. Samtidig fører det nok til at nokre vel å flytte andre stadar fordi dei ikkje finn arbeid her, seier Bekken Sjåholm.
Møre og Romsdal har tidlegare hatt ein god og stabil befolkningsvekst, mykje på grunn av innvandring.
– Arbeidsinnvandrarane er her på grunn av arbeid, så det er naturleg å tenke at dei flyttar dit dei finn seg jobb, seier Bekken Sjåholm.
- Les også:
Vil følgje utviklinga tett
Bekken Sjåholm meiner likevel at det er for tidleg å konkludere på bakgrunn av tala frå 1. kvartal, men seier at dei vil følgje utviklinga tett.
– Desse kvartalsresultata kan variere mykje, og eg trur vi må vente til vi får oversikta over ei litt lengre tidsperiode for å vere sikre på at dette er ei negativ utvikling, seier ho.
Bekken Sjåholm trur innbyggartalet i stor grad vil bli påverka av utviklinga innanfor næringslivet.
– Befolkningsutviklinga vil truleg følgje dei konjunkturane som vi ser i næringslivet. Så inntil vi får betre situasjon innanfor dei viktigaste næringane i fylket, så kan talet fortsette og falle, seier ho.
- Les også:
