215 søkjarar utan lærlingplass i Møre og Romsdal

Torunn Lied Giske ved Opplæringskontoret for Maritime fag i Ålesund seier at mange står på ventelister.

– Vi har langt færre lærlingkontraktar i år enn vi har hatt på mange år, seier Giske.

I løpet av eit år har talet på lærlingplassar blitt halvert.

– I år har vi 87 kontraktar i tre fag. Det er godt under det vi hadde i fjor då vi låg på 168 kontraktar, seier ho.

• Les også: Maskinistmangel i fiskeflåten

Ikkje aktuelt å nedprioritere lærlingar

Ei undersøking frå Fiskebåt og Maritimt Kompetansesenter viser at kvar tredje maskinist på fiskebåt nærmar seg pensjonsalderen.

I Ulsteinvik merkar reiarlaget Island Offshore godt nedgangstidene, men å nedprioritere lærlingar er ikkje eit tema.

Assisterande mannskapssjef Anne Mundal Aarskog, seier at dei har tatt inn 20 nye lærlingar.

– Dagens kapteinar og maskinsjefar skal ut i pensjon etter kvart, og då må vi ha nye kvalifiserte personar til å erstatte dei, seier ho.

– Dersom reiarlaga ikkje tek ansvar og legg til rette for å opprette lærlingplassar så har vi ingen norske kapteinar eller maskinsjefar igjen i framtida, held ho fram.

• Les også: Nedgangstider fører til færre lærlingplassar

Rår ungdomane til å ta påbygg

At mange står utan lærlingplass var ikkje uventa for opplæringskontoret i Ålesund. Dei har vore ute på skulane og gitt råd til elevane.

– Det er klart det er ein kjedeleg situasjon for ungdomane. Manglande lærlingplassar kan bety eit opphald i utdanninga for mange, seier Torunn Lied Giske.

– Vi rår dei som kan til å ta påbygg, held ho fram.

• Les også: – Å ta inn lærlinger er å investere i framtiden til bedriften
• Les også: For få fagarbeidere