– 65 millionar held berre til flikking

Helsepolitikarane er samde om at Molde sjukehus på Lundavang treng avløysing. Men måten dette skal skje på er så konfliktfylt, at sjukehuset står i fare for å rotne på rot. Sjukehuset er slite og vedlikehaldet har vore mangelfullt.

– Her kan de sjå ein kontorplass. Dette er plassert som eit forkontor til toalettet, fortalde Grete Teigland, avdelingssjef for gynekologi og føde, til representantane i det nye styre for Helse Møre og Romsdal då dei var på synfaring i dag.

• Les også: - God grobunn for bakterier

– Kan ikkje vente

Dette er berre eitt eksempel på dei vanskelege tilhøva ved det gamle sjukehuset i Molde. Sjukehuset er så nedslite, at alle forslag om at desse bygningane skal oppgraderast til eit nytt og fullverdig sjukehus er lagde til side. Alternativa er eit felles sjukehus mellom Kristiansund og Nordmøre, eller å byggje eit nytt på Eikrem i Molde.

– Vi kan ikkje sitje og vente på noko felles sjukehus. Det vil ta mange, mange år å realisere eit slikt sjukehus. Det blir mange, mange kampar og omkampar. Det kan ta 20 år før eit slikt sjukehus kan vere på plass. Vi kan ikkje vente på dette, seier Knut Ivar Egseth, tillitsvald i Fagforbundet.

• Les også: Utset budsjettkutt og nytt sjukehus
• Les også: Avviser flytting av neonatal avdeling

– Ikkje for framtida

Nokre har stilt spørsmål ved om det er rett å bruke 65 millionar kroner på eit sjukehus som ikkje skal vere i bruk om nokre år. Uansett rekk 65 millionar kroner berre til småflikking, seier styreleiar John Harry Kvalshaug.

– Her er det trongbudd og det er ikkje funksjonelt framtidsretta. Likevel er her ei ånd og eit personale som gjer at pasientane møter eit godt innhald i sjukehuset, seier Kvalshaug.

• Les også: Sjukehusdraumen kan verte realisert
• Les også: - Hun forlenger sykehusstriden

– Løyse det grunnleggjande

Dei 65 millionar kronene er ei slags førstehjelp for å bremse forfallet på sjukehuset.

– Vi må løyse det elementære som det er meldt avvik på. Vi må vere ærlege på at dette held berre til små flikkingar. Men det skal vere tilstrekkeleg, ifølgje fagrapportane. Då kan det drivast forsvarleg her i ein periode på fem til sju år, seier Kvalshaug.

• Les også: AMK sentalen i Molde består

– Svært utfordrande

Det er trongt og tungdrive i dei gamle bygningane på Molde sjukehus. Både tilsette og pasientar slit med dette kvar einaste dag.

– Tilsette og pasientar går på kryss og tvers når dei skal inn og ut frå undersøkingar og til ulike behandlingar. Det er svært utfordrande, seier styremedlem i Helse Møre og Romsdal, Torbjørg Vanvik.

• Les også: - Regjeringa har endra premissane i sjukehussaka

– Maksimalt av kva som er mogleg

Dei 65 millionar kronene skal altså brukast slik at dei gamle bygningane ved Molde sjukehus skal kunne gjere teneste nokre få år til.

– Vi planlegg for at Molde sjukehus skal vere brukbart i fem til sju år til. Det trur eg er maksimalt av kva som er mogleg innan akseptable rammer, seier Svein Anders Grimstad, styremedlem i Helse Møre og Romsdal.