Google fotograferer og kartlegg gater og hus verda rundt, slik at internettbrukarane kan zoome inn på kvar minste detalj.
Også personar risikerer å kome med på bileta som vert lagt ut på Google Street View.
– Eg forstår godt at nokre reagerer på det, og at dei synest det er ei inntrenging i den private sfæren, seier direktør i Datatilsynet Bjørn Erik Thon.
Grensar til ulovleg
Han meiner dei omreisande Google-bilane som fotograferer gatelangs verda over, opererer i eit grenseland av kva som er lovleg.
– Det er nok ikkje lovstridig å gjere det på denne måten. Men det er klart at dersom personlege detaljar vert avslørt, til dømes folk som vert fotografert i bar overkropp medan dei grillar, kan det vere det. Då er Google forplikta til å rette eller sladde bileta, seier Bjørn Erik Thon.
– Viss eg tilfeldigvis skulle vere der når Google-bilen passerer forbi, medan eg er på veg inn i ein skobutikk for å kjøpe meg eit par nye støvlar, kan eg ikkje sjå at det svekkjer livskvaliteten min på nokon måte, seier Tore Neset, redaktør i nettavisa digi.no.
- LES ÒG:
- LES ÒG:
Eit gode for nett-brukarane
Han ser stort sett berre fordelar med google-tenesta, der ein kan klikke seg inn på gatehjørna over heile verda og utforske nabolaga i 360 grader.
– Dette er eit gode for oss, fordi det gjer det lettare å finne fram. Ein skal heller ikkje stikke under ein stol at det kan vere kommersielt interessant, både for butikkar og kulturinstitusjonar, som ynskjer å marknadsføre seg når ein person oppsøkjer eit bestemt strøk i Google Street View, seier Tore Neset.
Dei omdiskuterte Google-bilane vart i førre veke observert i Drammen til begeistring for drammensarane og lokalpressa.
Men i andre land har bilane vorte kjeppjaga og ramponert. Ikkje alle synest det er stas at deira private heim vert fotografert av den populære internett-tenesta.
- LES ÒG:
Juridisk vanskeleg å forby
I Tyskland har innanriksministeren no teke initiativ til at tenesta kan regulerast av brukarane, etter at tyskarane viste kraftig motstand mot filminga. 52 prosent av alle tyskarar vil ikkje sjå huset sitt og leilegheitene sine på nettet.
I Tsjekkia har styresmaktene gått så langt som å forby biletinnhentinga til Google.
– Det er det mange som meiner at det ikkje er ei endeleg avgjersle. For både EU-reglane, og tsjekkisk lov opnar for denne type fri offentleg fotografering som i andre land. Dette er ei juridisk nøtt, der resultatet i Tsjekkia ikkje er gjeve enno, seier Bjørn Erik Thon.
Google Street View har sidan i fjor køyrt gatelangs i Noreg og fotografert meter for meter. I Noreg er reaksjonane blant folk, på at heimane deira vert fotgraferte, delte. Mange ser den forbipasserande google-bilen som deira sjanse til 15 minutters rampelyset.
- LES ÒG:
- LES ÒG:
Fotoattkjenning-teneste neste
Men no førebur nett-tenesta sitt neste steg: Ein mobiltelefon som kan ta portrettbilete, slik at ein ved hjelp av eit foto kan få vite alt om den ukjente personen som sit overfor oss på bussen.
– Eg ser ikkje på det som ei spesielt lystig utvikling. Samstundes det er alltid mange tenester som er under utvikling, og heldigvis er det ikkje slik at alt som er mogleg vert ein realitet, seier direktør i Datatilsynet Bjørn Erik Thon.
Det har ikkje lukkast NRK å få intervju med Google i denne saka.
- Kva synest du– er det greitt at Google Street View fotograferer gata du bur i?