Til klimatoppmøtet i København er det venta rundt 4000 journalistar, medan berre 184 journalistar meldt at dei kjem til fredsprisutdelinga i Oslo.
Hjå TV2 planlegg dei si største nyhendesatsing nokon gong. Nyhendeanker Øyvind Brigg skal leie sjåarane gjennom noregsbesøket til Barack Obamas.
- Vi kjem til å ha ei fantastisk sending, så dette gler eg meg veldig til, seier Øyvind Brigg.
- LES ÒG:
Norsk media satsar
Også NRK, Dagbladet, VG og Aftenposten seier til NRK at dei vil bruke svært mykje ressursar på årets fredsprisutdeling. Men utanlandsk media prioriterer annleis. Berre 184 utanlandske journalistar har meldt at dei kjem på prisutdeling, ifølgje Mette Øvre i Utanriksdepartementet. Hun karakteriserer den utanlandske medieinteressa som middels stor.
- Eg trur det er altfor tidleg å konkludere om det internasjonale interessa, den kjem til å vekse dramatisk når det nærmar seg besøket, seier direktør for Nobelinstituttet Geir Lundestad.
Han meiner interessa for besøket er stor internasjonalt, spesielt frå USA, sidan Obama til ei kvar tid har med seg 80-100 mediefolk. Og desse er ikkje rekna med i oversynet til UD. Likevel er det eit faktum at langt fleire journalistar kom til Noreg under Oslo-prosessen, og dei kongelege bryllaupa og gravferdene ifølgje UD.
Prioriterer klimatoppmøtet
Sjølv om fleire journalistar kan melde si interesse før fristen går ut på måndag klarer nok ikkje Nobelprisutdelinga å konkurrere med klimatoppmøtet som går føre seg samstundes i København. Til klimatoppmøtet er det venta 4000 journalistar frå heile verda.
BBC er blant dei som sender journalistar København, men droppar utdelinga av Nobels fredpris.
- I Noreg liker ein å tru at Nobels fredspris er den største nyhenda i heile verda, men den er nok ikkje det, seier Lars Bevanger, som dekkjer Skandinavia for BBC.
Han synest ikkje at det er underleg at BBC prioriterer klimatoppmøtet i København framfor fredsprisutdelinga, når dei fell på same helg.
- Nobelprisutdelinga er ein ganske satt affære, det same skjer kvart år. Og når tv-kanalane uansett får bilete gratis, er det ikkje nokon vits i å sende eigne folk, meiner Bevanger.
Trur på rekord
Vaktsjef i TV2 Nyhetene, Bård Espen Hansen, vel å satse stort, trass i at kassa er tom.
- Vi bruker frykteleg mykje pengar på dette, vi har eigentleg ikkje råd. Men vi er nøydde til å gjere det skikkeleg. Det er eit historisk besøk av ein historisk person, seier Bård Espen Hansen.
Hansen grunngjev satsinga med at Obama-besøket er noko ein kjem til å hugse i ettertid, og at det difor er viktig å gjere det skikkeleg.
Også direktøren for Nobelinstituttet er trygg på at årets fredsprisutdeling vil verte eit høgdepunkt.
- Eg trur talen til Obama kjem til å setje ny rekord, når det gjeld gobal dekning av eit Nobelarrangement, seier Geir Lundestad.