Tvillingbroren om Robert Stoltenberg: – Eg er hans største fan

Robert Stoltenberg er eit kjent fjes for mange.

Roy Narvestad og resten av karakterane i Borettslaget, sketsjane med Herman Flesvig, og nå miss Trunchbull i «Mathilda–The Musical» på Folketeateret har gjort Robert Stoltenberg til Noregs humorskatt.

Men visste du at han har ein tvillingbror? Og at dei saman var superkjendisar på starten av 90-talet?

Dei energiske og underhaldande tvillingane vart nemleg oppdaga av NRK og putta i TV-programmet «Panorama». Dei vart enormt populære.

Berømt og ulukkeleg

– Det var dette vi hadde drøymt om: «Berre vi blir berømte». Plutseleg var vi veldig kjende. Vi hadde den snåle oppfatninga om at «viss eg blir kjend nok, blir eg lykkeleg», fortel Robert i kveldens Lindmo.

– Slik var det ikkje, legg han vidare til.

Den morosame kvardagen korresponderte ikkje med korleis dei følte seg innvendig.

– Eg var i eit stadium i livet der eg måtte finne ut av meg sjølv, og det å vere homofil. Når du kjenner deg usikker på innsida, men på utsida presenterer eit bilete der du er blid og kul, blir avstanden stor. Og du blir endå meir ulukkeleg, seier Robert.

I tillegg var dei i ein fase der dei hadde behov for å lausrive seg frå kvarandre og finne sin eigen identitet.

– Så vi kutta heile greia, opplyser Robert.

Vanskeleg å bryte opp

Da hadde dei levd og gjort omtrent alt saman i 25 år. For fyrste gong skulle dei gå kvar sin veg.

– Eg synest det var veldig vanskeleg, for Robert gjekk ofte i bresjen for ting, men nå vart eg heilt åleine, fortel Harald.

Han bestemte seg for å reise til Danmark. Der utforska han kunst, dansa ballett og gjorde ablegøye-teater.

– Det er så herleg å vere ein stad der den identiteten du har er den du har her og nå. Men det var også tøft fordi du måtte starte heilt på nytt, fortel Harald.

Støttar kvarandre trass krangling

Mens Harald kom tilbake til Oslo som diakon og psykoterapeut, levde Robert livet som humorstjerne på norske TV-skjermar.

Harald har ikkje hatt noko i mot å vere mindre synleg i rampelyset enn broren sin:

– Eg har alltid sagt at eg er hans største fan. Eg vil alltid klappe for han, seier Harald.

Nå har dei skrive boka «Turbotvillingene og den store kanonballkampen» saman. Den er basert på barndomen deira.

– Å jobbe saman med boka har vore kjempemorosamt. Vi har kome tilbake til der vi var, seier Robert.

Dei innrømmer at dei likar kvarandre sitt selskap, men har ikkje behov for å snakke saman kvar einaste dag.

– Vi kranglar veldig mykje, men vi har det også veldig hyggjeleg saman. Eg er veldig stolt av han, seier Robert.

Sjå Lindmo på NRK 1 fredag kl. 21.35 eller når du vil i NRK TV.