Kringkastingsrådet var samla i dag for mellom anna å behandle ei klage om NRK-dekninga av Maria Amelie-saka. I klagen vert det hevda at saka har fått ei skeiv framstilling i NRK og media generelt, og at journalistane har gjort sitt ytste for at Maria Amelie skulle få bli i landet.
– Vi tar mykje sjølvkritikk på fleire områder, sa nyheitsredaktør i NRK, Stein Bjøntegård.
– Styrt av politisk kamp
– Ein for stor del av dekninga fokuserte på kjenslene til Maria Amelie. Vi var også for mykje styrt av den politiske kampen og forsømte oss med å ikkje vere kritiske mot kritikarane, sa Bjøntegård.
Han framheldt at NRK aldri har inntatt noko klar haldning på leiarplass for eller imot om kvinna skulle få bli i landet, slik som mange aviser har gjort.
Sjå møtet i Kringkastingsrådet her:
– Sterkare emosjonelt inntrykk
Noko av kritikken NRK fekk frå medlemene i Kringkastingsrådet var at dei hadde gitt Amelie og støttespelarane hennar for mykje taletid.
– Vi brukte mange minutt på dei som forsvarte avgjerda om at Maria Amelie måtte reise også, forklarte leiar av samfunnsredaksjonen i NRK, Kyrre Nakkim.
– Men sjølv om vi bruker like mykje tid på dei, vil biletet av ei grinande kvinne gjere eit sterkare emosjonelt inntrykk på sjåarane enn det motsette, for eksempel ein statssekretær som brukar saklege verkemiddel, sa han.
«Bjellesauen»
Dei fleste medlemene i rådet uttalte seg om saka.
– Ser ein NRK under eitt, så var dekninga balansert. Men «bjellesauen» her er Dagsrevyen, som blir sett av heile Noreg. Eg meiner Dagsrevyen lenge var på Maria Amelie si side, kritiserte Frank Rossavik.
– Dekninga av kvardagsdramaet til Maria Amelie gav sjølvsagt god TV, og eg har full forståing for at NRK dekte det, meinte Knut Haavik.
Ifølgje Sylfest Lomheim var volumet på saka for stort.
– Nettverket til Maria Amelie var heilt uvanleg og det er då NRK må halde hovudet kaldt, sa han.
Har fått kritikk tidlegare
Førre gong diskusjonen kring mediedekninga av Maria Amelie-saka var oppe i media var det få redaktørar som tok sjølvkritikk.
Høyr debatt frå Kulturnytt i januar:
Trygve Hegnar var blant kritikarane og meinte at pressa dreiv kampanjejournalistikk og var mikrofonstativ for kvinna.
- Les:
– Både Utlendingsnemda, Politiets utlendingsenhet og Regjeringa har fått grunngi sine standpunkt på ein grundig måte, uttalte Bjøntegård til fagbladet
då. Verken han eller nyheitsredaktør i Dagbladet, Alexandra Beverfjord, var einige i at dei dreiv kampanjejournalistikk.Kva synest du om dekninga av saka? Diskuter her!
NRK har sett seg nødt til å stenge debatten på grunn av uakseptabel språkbruk i enkelte av innleggene.