Skarra fekk tilbod frå arrangøren bak moteveka i Paris om å vise som ein av 15 designarar i eit spesielt mote-og kunstprosjekt, som er del av det offisielle programmet.
– Det er kjempespennande og stort! Arrangørane sa at dei likte designen min, og at det var grunnen til at dei gav meg tilbodet. Nokre av dei største, unge designarane i verda er plukka ut. Det er store merker som er blitt spurt, seier Skarra til NRK.no.
Ho kan ikkje røpe dei andre namna, sidan dei ikkje har takka ja offisielt enno.
Det er på moteveka i Paris store namn som Christian Dior, Stella McCartney, Chanel og Valentino viser fram kolleksjonane sine.
– Svært sjeldan
Skarra fortel at arrangørane vil prøve ut ein ny måte å vise kolleksjonar på, og at visninga blir ein mellomting mellom dei tradisjonelle catwalkshowa og pressevisningane, der pressa får sett nærmare på plagga.
Kvar designar får samarbeide med ein kunstnar og Skarra har allereie byrja å tenkje på kven det skal bli.
Les også:
– Det er kjempekult å få tilbodet og det er sjølvsagt noko eg har lyst å vere med på. Men eg må finne både ein økonomisk og kunstnarisk partnar, seier Skarra.
Mote- og trendredaktør i Henne, Lisbeth Guldbrandsen, kan berre hugse to andre norske designarar som har vist i Paris dei siste 20 åra. I 1993 viste Pia Myrvold sin første kolleksjon der. Også Julie Skarland har vist fleire gongar i Paris, den siste gongen i 1998.
– Dette er stort og ei spanande moglegheit for Nina Skarra. Det er svært sjeldan at norske designarar blir plukka ut til moteveka i Paris, seier ho til NRK.no.
– Dei største talenta
Ho meiner arrangørane bak moteveka i Paris er svært dyktige til å plukke ut og presentere nye designnamn.
– Det er dei største talenta og ei god blanding av ulike designarar som får vise der. Arrangørane har vore dyktige til å hente inn utanlandske designarar og moteveka i Paris har blitt ei gryte av kreativitet, seier ho.
Slik skildrar ho designaren:
– Nina Skarra har ønska å satse i utlandet lenge og eg trur det er klokt å sjå utanfor Noregs grenser, slik ho gjer. Designen hennar er kjenneteikna av skulpturelle former og ho har ein spanande måte å bruke stoffa på, nesten litt arkitektonisk, seier Guldbrandsen.
Skarra har fleire høgståande klientar i Hollywood, mellom anna Penelope Cruz og Livia Firth, og blir mykje brukt på den raude løparen. Ho er representert med PR-agentar i Los Angeles og Paris, men har sjølv base i Oslo.
Les:
Moteveka i Paris går av stabelen frå 26. september til 5. oktober, som den siste av dei store motevekene. Det er vår- og sommarmote for 2012 som blir vist her.