Ayaan Hirsi Ali er av Sylvi Listhaug invitert til Norge saman med den danske innvandringsministeren Inger Støjberg for å planlegge eit felles framstøyt.
Framleis lever Hirsi Ali under konstant overvaking, 12 år etter at ho, i samarbeid med den kontroversielle regissøren Theo van Gogh, laga filmen «Submission».
Berre nokre få månader etter at filmen, som handlar om kvinnemishandling i muslimske miljø i Nederland, kom i 2004, blei Theo van Gogh skoten og drepen på open gate av ein radikal muslim.
Toppmøte i Oslo
Frå før er det tett kontakt mellom den norske og den danske innvandringsministeren. Men også den tidlegare nederlandske politikaren Ayaan Hirsi Ali var fredag invitert til toppmøte i Oslo. Dei meiner ytringsfridomen er sett under press.
Den somalisk-fødde forfattaren og aktivisten kjenner det sjølv dagleg på kroppen kva det kostar å sei si meining.
– Det er ikkje hemmeleg at eg er trua. Det fortel noko om ytringsfridomen i dag, den er trua av radikale islamistar. Eg kan ikkje gjere jobben min og eg kan ikkje snakke om kvinners rettar utan å bli trua, seier Hirsi Ali til NRK.
– Innvandringspolitikken er lite planlagt
Hirsi Ali, som er tidlegare parlamentsmedlem i Nederland, ser i likskap med dei norske og danske ministerkollegaene faresignal for ytringsfridomen.
– Eg meiner det er veldig forståeleg at dei ønskjer å stenge grensene. Den tilstrøyminga vi nå ser frå Afrika, Midtausten og Sør-Asia er så overveldande at det kjem til å skape store vanskar. Det skaper allereie store vanskar. Du kan ikkje ha ein fornuftig innvandringspolitikk viss du ikkje kontrollerer grensene. Akkurat nå er innvandringspolitikken spontan og lite planlagt, seier Hirsi Ali.
Etter dagens møte i Oslo er dei tre einige, dei vil starte ein ny debatt, den begynner på ein konferanse neste år.