Laurdag 2. mars 2019 blir det avgjort kven som skal representere Noreg i Eurovision Song Contest i Tel Aviv i Israel i mai. Planlegginga av det som kan bli tidenes største MGP-finale er i full gang.
Produsent og musikkansvarleg Stig Karlsen har tidlegare lova at det skal bli eit spektakulært MGP-show.
– Vi jobbar heile tida for å strekke strikken litt lengre for kvart år. Meir enn ein million feststemte nordmenn ventar seg mykje av MGP-kvelden, og då må vi levere.
Nytt programleiarpar
For femte år på rad skal Kåre Magnus Bergh vere programleiar for musikksirkuset. I 2015, 2016 og 2018 delte han oppgåvene med Silya Nymoen. Medan han hadde med seg Line Elvsåshagen som makker i 2017.
I år får han med seg skodespelar og songar Heidi Ruud Ellingsen, som denne hausten har gjort stor suksess i musikalen «Flashdance» i Oslo. Bergh trur det blir bra å få med seg Ellingsen på laget.
– Ho er ei veldig sprudlande og talentfull kvinne som eg trur vil passe fint inn i formatet. Ho er for eksempel mykje flinkare til å synge og danse enn meg.
Ellingsen gler seg også til å ta fatt på oppgåvene med å leie eitt av dei mest populære TV-showa i Noreg.
– Det er eit ærefullt oppdrag å skulle leie eit program som engasjerer så kraftig. Eg ser på dette med skrekkblanda fryd, men mest fryd.
Artistslepp i januar
Sjølv om planlegginga er i gang, er det framleis mykje som står att før det brakar laus i mars. No som det er klart kven som skal vere programleiarar, startar også arbeidet med å finne ut kva roller dei skal ha under sendinga.
– Vi skal bruke dei eigenskapane vi har vi som skal vere programleiarar. Dette er også eit program mange har eit sterkt forhold til og meiningar om, så det gjeld å ikkje tulle det til for mykje, seier Bergh.
Ellingsen har sjølv kjent på spenninga under konkurransar og premierer. Ho trur det kan kome godt med.
– Eg er artist sjølv, og veit litt kva deltakarane går igjennom. Det er noko eg tek med meg inn i denne jobben. Og så blir det vår jobb å få artistane til å skinne.
Artistane og låtane som skal konkurrere om å bli det norske bidraget i Israel blir presentert på ein pressekonferanse 25. januar.
