Google tvangsslettar frå din mobil

Førre veke fann Google ut at det låg innhald i nettbutikken deira som kunne gje hackarar tilgang til Android-mobilar. Utviklarane vart kasta ut og applikasjonane fjerna frå nettbutikken, ifølgje IT-avisen.

No kjem det fram at Google i tillegg har gått inn i mobilane til brukarane og sletta dei skadelege applikasjonane.

Sletting først, så varsling

Google har fjerninstallert eit sikringsprogram som tek vekk farleg innhald i mobilane og deretter varsla brukarane ved å sende ut ein e-post.

– Google har forstått at dei har sloppe gjennom applikasjonar som ikkje er i brukaren si interesse. Dei har gjort ryddejobben i etterkant, men det er positivt at dei har rydda opp, seier medieutviklar og leiar i «Stopp Datalagringsdirektivet», Anders Brenna.

– Men potensialet for misbruk er der, fordi du kjøper ei vare til mobilen din og så kan Google seinare bestemme at dette innhaldet bør du ikkje ha, seier Brenna.

Kan sensurere

– Problemet er at Google kan slette applikasjonar som brukarane vil behalde. Amazon Kindle sletta for nokre år sidan ei bok som ein lesar hadde kjøpt, og det skapte sterke reaksjonar. Google kan også trå feil, og konsekvensane blir store med fleire millionar brukarar, seier Brenna.

Han er meir bekymra for sensurmoglegheitene til Google enn at dei skal gå inn og overvake brukarane.

– Det ville vere ein kommersiell katastrofe å gå inn og overvake brukarane, dei ville ha tapt masse pengar på det om det kom fram, seier han.

Stolar på Google

Teknologibloggar i VG, Kristine Løwe, meiner ein kan stole på at Google forvaltar slettemoglegheitene på ein skikkeleg måte.

– Det ville vore mot deira interesse å misbruke denne moglegheita. Ein ser at folk reagerer voldsomt berre til dømes Twitter innfører annonsar og at det skaper nettstormar, seier ho.

Det har også vore kontrovers rundt sensuren til Apple av innhald i deira nettbutikk, App Store.

• Les: Apple fjerner nazimusikk?
• Apple gir etter for danske pupper
• «Epleskatt» opprører mediabransjen

– Desse problemstillingane minner oss på at vi er prisgitt spelereglane til programvareleverandørar som Apple og Google, seier Løwe.

Ho forklarar at Google gjennom brukaravtalar har sitt på det tørre når det gjeld å fjerne innhald frå Android.

Kva er skadeleg?

På nettsida til Android Developers står det at den fjernstyrte slettinga er «eit av mange sikringstiltak som Android bruker for å beskytte brukarane frå skadelege applikasjonar.»

«I nødstilfeller kan ein farleg applikasjon bli fjerna frå aktiv sirkulasjon hurtig for å hindre vidare eksponering til brukarane,» står det vidare.

Spørsmålet er kva som kvalifiserast som «skadeleg» og «nødstilfelle».

– Skal Google kunne bestemme kva som ikkje eignar seg for din telefon? Menneske har forskjellige grenser for kva som er greit og ikkje greit å sensurere, og då blir det problematisk at eit amerikansk selskap skal ta den avgjerda for oss, seier Anders Brenna.

• Les også: Nokia og Microsoft sammen mot konkurrentene
• Du kan betale med nye Android-telefoner
• Applikasjoner kan stjele data