– Dersom ikkje Apple justerer dette løpet, så trur eg at fleire og fleire, også dei store aktørane i marknaden, kjem til å gå for opne løysingar som Apple ikkje kan kontrollere, seier Anders Opdahl, redaktør i avisa Nordlys. Han er ein av fleire i mediabransjen som reagerer på at Apple vil ta ein «epleskatt» på 30 prosent av digitale abonnementsordningar.
Må selje gjennom Apple
Det var etter lanseringa av den Ipad-eksklusive digitalavisa «The Daily» førre veke at mediemogul Rupert Murdoch røpte at Apple tek ein tredjedel av abonnementsinntektene frå avisa.
– I alle fall det første året, uttalte han i eit intervju med Fox News.
Tidlegare har aviser som Nordlys tilbudt lesarar med papirabonnement digitalutgåva gratis. Det blir det ikkje høve til å gjere lenger, for alle som sel digitalt innhald på Ipad eller Iphone må tilby kundane kjøp via betalingssystemet til Apple, App Store.
Og med App Store kjem prosentkravet.
– Gjer det vanskeleg for seg sjølv
No har to av dei største presseorganisasjonane i Europa kalla inn til eit ekstraordinært møte der dei vil diskutere abonnementsreglane til Apple.
Misnøyen i mediabransjen går blant anna ut på at mange forlag og mediehus kjenner seg sterkt delaktige i utviklinga av nettbrettet Ipad, som har blitt ein suksess, og har investert masse pengar i det.
– Apple gjer det vanskeleg for seg sjølv. Eg ser på dette som eit sjølvskot for deira del av minst to grunnar: Det tvingar oss (mediabransjen, journ.merkn.) til å auke hastigheita med tanke på å utvikle innhald for andre og meir opne plattformer. Samtidig er det ei svekking av omdømet til Apple, meiner redaktøren i Nordlys.
Høyr saka i Kulturnytt:
– Trudde dei kunne sleppe prosentkrav
– Dei vart tatt på senga, seier teknologibloggar Kristine Løwe, som blant anna skriv for VG Digital, om kvifor det er så sterke reaksjonar på dei nye reglane blant mediefolk.
– Det var nok ei overrasking for mange i mediabransjen som hadde trudd at dei kunne fortsette å dirigere lesarane sine til eigne betalingsløysingar og sleppe 30 prosentkravet på abonnement, forklarar ho, og legg til at ein tidlegare trudde det var rom for å omgå reglane, ved å selje innhaldet i eigne salskanalar.
– Dei (redaktørane, journ.merkn.) var kanskje ikkje førebudde på at dei skulle gje bort så mykje av dei ganske små inntektene dei har her i utgangspunktet, seier ho.
Nye alternativ
Løwe trur redaktørar no byrjar å sjå seg om etter andre løysingar.
– Alternativa til Apple er Android-baserte lesebrett, men dei er egentlig ikkje komne så langt på betalingsløysingssida som Apple har. Det mange mediehus jobbar med no er såkalla HTML5-baserte løysingar, der ein lagar webbaserte appar, slik at alt skjer i nettlesaren. På sikt håpar ein å omgå plattformer som Apple på den måten, hevdar ho.
Itunes-sjef i Apple, Eddy Cue, sa på lanseringa av «The Daily» at dei vil avsløre fleire detaljar om abonnementsreglar i nærmaste framtid.
Apple ville ikkje svare på spørsmål om dette frå NRK.
Les også: