NRK Meny
Normal

Erlend Bratland om Stjernekampexit: – Eg er skuffa og sjokkert

Erlend Bratland er overraska og skuffa over at han rauk ut av Stjernekamp laurdag kveld. Trass i gode tilbakemeldingar, fekk han færrast stemmer av sjåarane.

Overraska Bratland Stjernekamp

Det var mange som blei overraska då Erlend Bratland måtte reise heim etter countrykvelden.

Foto: Julia Marie Nagelstad / NRK

I kveld blei ni deltakarar til åtte i countrysendinga. I løpet av programmet fekk vi både fest på lokalet, som i Lisa Børud si tolking av Gretchen Wilson-låta «All Jacked Up», og hjarteskjerande kjærleik, som når Aleksander Walmann nesten fekk fram tårene hos Bjøro Håland då han framførte «Whiskey Lullaby».

I kveld var det Erlend Bratland som måtte reise heim etter å ha sunge «Before He Cheats» av Carrie Underwood. Han fekk gode tilbakemeldingar frå dommarane etter at han hadde vore på scena. Men han nådde ikkje ut til nok sjåarar i kveld.

Bjøro Håland og Erlend Bratland Stjernekamp 2017

Fagdommar og mentor Bjøro Håland gav Erlend Bratland gode skottsmål i sendinga, men Bratland fekk for få stemmer til å gå vidare.

Foto: Julia Marie Nagelstad / NRK

– Eg er skuffa og sjokkert over det som har skjedd. Eg synest det er rart, men det er ikkje noko eg får gjort noko med, seier han til NRK.

I det første programmet sa Bratland at Stjernekamp var eit program han hadde drøymt om å få vere med i sidan første sesongen gjekk på TV. Og opphaldet, sjølv om det blei kort, har svart til forventningane.

– Eg har hatt ei veldig fin tid i Stjernekamp. Det er ein superfin gjeng som det er godt å vere saman med. Det blir litt trist at dette blir siste kveld med gjengen. Akkurat no er eg litt utanfor.

Favorittstempel

Den amerikanskfødde Adam Douglas er i ferd med å skaffe seg eit favorittstempel i årets Stjernekamp. Før sending i dag sa han at han byrja å merke presset. Etter gode tilbakemeldingar i dei to første sendingane, var han på heimebane i country. Og han leverte ei framføring som ifølgje dommarane var noko av det beste som har vore prestert i Stjernekamp.

Douglas er også ein av favorittane til Erlend Bratland, som i kveld måtte takke for seg.

– Det er framleis tidleg i konkurransen, og mykje kan skje dei komande vekene. Men Adam ser veldig sterk ut. Han skil seg ut, og eg trur han kjem til å kome langt.

Dette var tilbakemeldingane dommarpanelet, der Mona B. Riise, Thomas Felberg og Bjøro Håland sat i kveld, gav til Stjernekamp-deltakarane.

Lisa Børud: «All Jacked Up»

Lisa Børud country Stjernekamp 2017

Lisa Børud sørga for fest på lokalet med «All Jacked Up» av Gretchen Wilson

Foto: Julia Marie Nagelstad / NRK

Originalartist: Gretchen Wilson (2005)

Av: Gretchen Wilson, John Rich, Vicky McGehee

Håland: – Når du ser slik energi, burde du ha vore modell for linedance. Den rølpete teksten forsvinn litt i alt kompet, men det er greitt. Du syng veldig bra, og er allereie ei ung countrystjerne.

Felberg: – Countryfesten er i gang. Du har naturleg countrysleng i tonen. Du kler scenen. Men kanskje litt andpusten på de mørke tonen.

Riise: – Du har ein utruleg sjølvtillit i måten du ter deg på scenen. Du mister litt pusten undervegs.

Didrik Solli-Tangen: «Drive (For Daddy Gene)»

Didrik Solli-Tangen country Stjernekamp 2017

Alan Jackson tileigna «Drive (For Daddy Gene)» til faren Eugene. Didrik Solli-Tangen gav laurdag sin versjon.

Foto: Julia Marie Nagelstad / NRK

Originalartist: Alan Jackson (2002)

Av: Alan Jackson

Riise: – Du lever deg inn i det, og formidlar teksten fint. Songen går kanskje litt lågt for deg i starten. Du er veldig god, men kan kanskje løyse opp litt og ikkje vere så kontrollert.

Håland: – Countryen er teke tak i deg. Eg trur på deg i måten du formidlar teksten på.

Ida Maria: «Rose Garden»

Ida Maria country Stjernekamp 2017

Lynn Anderson fekk først ikkje spele inn «Rose Garden» fordi teksten var upassande for ei kvinne. Laurdag var det Ida Maria sin tur til å framføre songen.

Foto: Julia Marie Nagelstad / NRK

Originalartist: Billy Joe Royal (1967) og Lynn Anderson (1970)

Av: Joe South

Felberg: – Det er gøy at vi får sjå ei ny side av deg denne gongen. Du syng låten kult. Dette viser at du er ein allsidig songar.

Håland: – Du minner meg om Loretta Lynn. Du er ei skikkeleg show-jente, og er leverer ekte country. Eg byrja nesten å grine, men eg lova deg å la vere.

Gaute Ormåsen: «Life Is A Highway»

Gaute Ormåsen country Stjernekamp 2017

Tom Cochrane skreiv «Life Is A Highway» i 1991. I 2006 fekk Rascal Flatts ein hit med songen, då han blei brukt som filmmusikk i animasjonsfilmen «Biler». Laurdag var det Gaute Ormåsen som la i veg.

Foto: Julia Marie Nagelstad / NRK

Originalartist: Tom Cochrane (1991), Rascal Flatts (2006) m.fl.

Av: Tom Cochrane

Håland: – Det går litt fort. Det er litt vanskeleg å få med alle orda. Men eg merka at dette var ein song mange i publikum kunne.

Felberg: – Godt å sjå deg by opp til dans, men eg synest du startar litt haltande. Det kjem seg på refrenget. Det gjekk ok, men ikkje over fastgrensa.

Benedicte Adrian: «Lipstick»

Benedicte Adrian country Stjernekamp 2017

«Lipstick» er ein av dei ferskaste songane i kveld. Jentetrioen Runaway June kom på topp 40 av den amerikanske countrylista i fjor. Laurdag var det Benedicte Adrian som oppmoda til å kline i staden for å grine.

Foto: Julia Marie Nagelstad / NRK

Originalartist: Runaway June (2016)

Av: Naomi Cooke, Caroline Hobby, Hannah Mulholland, Jennifer Wayne, Elisha Hoffman, Rebecca Lynn Howard

Riise: – Klangen i stemma di passar godt til denne songen. Det var herleg å sjå deg kaste deg uti det med både song og dans. Eg merkar framleis at du er litt usikker. Men du gjer klar framgang.

Håland: – Du har klar framgang frå øvinga. Eg sa at du må bruke munnen din meir, og det gjorde du i dag.

Aleksander Walmann: «Whiskey Lullaby»

Aleksander Walmann country Stjernekamp 2017

«Whiskey Lullaby» var opphavleg ein duett med Brad Paisley og Alison Krauss. Aleksander Walmann gjorde jobben aleine.

Foto: Julia Marie Nagelstad / NRK

Originalartist: Brad Paisley & Alison Krauss (2004)

Av: Bill Anderson, Jon Randall

Håland: – Eg blei rørt. Dette var kjempebra. Eg trudde på kvart eit ord du song. Du formidlar dette på ein svært god måte.

Riise: – Stemma di står veldig godt til songen. Denne songen er så tragisk, men du formidlar teksten framifrå. Dette var det beste vi har sett av deg så langt i Stjernekamp.

Felberg: – Dette var revansj for deg etter førre veke.

Erlend Bratland: «Before He Cheats»

Erlend Bratland country Stjernekamp 2017

Carrie Underwood oppnådde stor suksess med «Before He Cheats» i 2006. Laurdag var det Erlend Bratland som song om hemn over ein utru kjæraste.

Foto: Julia Marie Nagelstad / NRK

Originalartist: Carrie Underwood (2006)

Av: Josh Kear, Chris Tompkins

Håland: – Måten du leverer på er veldig bra. Du er veldig til stades på scenen.

Felberg: – Du gjer denne låten til di eigen. Eg kjenner på sjalusien du formidlar, og tenkjer på at det er ein fyr som sit der ute med oppskorne bilseter.

Makeda: «9 to 5»

Makeda country Stjernekamp 2017

«9 to 5» er ein av dei største suksessane til Dolly Parton. Makeda arbeidde seg gjennom songen med dansande diner-servitørar.

Foto: Julia Marie Nagelstad / NRK

Originalartist: Dolly Parton (1980)

Av: Dolly Parton

Riise: – Dette var utruleg bra. Eg blir så glad. Du er så habil, og syng som ei gudinne. Du spelar ut låten gjennom song og dans. Du kunne kanskje ha slipt vekk litt av soul-lyden i stemma for å gjere det litt meir country. Men det er flisespikkeri.

Håland: – Det som imponerer meg den innsatsen du legg ned for å bli betre. Og i kveld har du følgt opp dei tinga eg på øvinga sa kunne blitt betre.

Adam Douglas: «I Can't Do This»

Adam Douglas country Stjernekamp 2017

Adam Douglas framførte «I Can't Do This» av Vince Gill, som kjem frå same stat som Douglas, Oklahoma. Gill er den mannlege countryartisten som har vunne flest Grammy Awards. Nyleg erstatta han Glenn Frey, som døydde i fjor, i The Eagles.

Foto: Julia Marie Nagelstad / NRK

Originalartist: Vince Gill (2016)

Av: Vincent Gill, Brennen Hunt, Cathy Gravitt

Riise: – Det kjennest som om hjartet er knust, men på ein god måte. Det er slik det skal gjerast. Eg har sete her i sesong etter sesong, og dette er noko av det beste eg har høyrt.

Håland: – Dette kan du. Måten du tolkar songen på, gjer at vi elskar deg. Du syng reint

Felberg: – Du har meg frå første tone. Dette er noko av det råaste eg har sett i Stjernekamp. Og samspelet med bandet er heilt fantastisk.