Emil Solli-Tangen om Snømonsteret: – Vil ikkje avskrive noko

– Eg held meg taus, seier Emil Solli-Tangen og vil verken bekrefte eller avkrefte rykta om at han er med i Maskorama.

Det kjem fram i dagens episode av Maskorama-podkasten, der leiar i Høgre og tidlegare statsminister Erna Solberg og komikar Lars Berrum, er gjestar.

I fleire veker har det blitt spekulert i om Snømonsteret er to personar, og at det er brørne Didrik og Emil Solli-Tangen som har bytta på å vere i kostymet dei siste laurdagane.

Det som undergrev denne teorien er at veslebror Emil er ute på turné fram til jul.

Saman med programleiar Sarah Natasha Melbye ringer Berrum og Solberg artisten for å bli litt klokare.

– Nokre laurdagar hadde gått

På spørsmål om det hadde blitt vanskeleg å kombinere turné med Maskorama svarer Emil:

– Eg hadde ikkje klart det kvar laurdag, men nokre laurdagar hadde gått.

– Så da kunne du ha gjort det med broren din – altså alternert? spør Melbye.

– Ja, det er nokon som hadde syntest at det hadde vore ein morosam ide om det var tilfelle.

– Eg synest det er gøy at vi ikkje avskriv det før teppet feller, svarer han.

• Høyr Maskorama-podkasten og høyr hinta du ikkje får andre plassar

Erna med knapp på Ylvis-brørne

Erna Solberg er blant dei som trur at Snømonsteret kan vere ein av Ylvis-brørne, altså Bård og Vegard Ylvisåker.

– Dei er kanskje betre enn meg på å leggje om bergensdialekta, seier ho.

Men ho får ikkje alle hinta om astronomi og fysikk til å stemme med dei to.

Ho spør derfor Emil Solli-Tangen om korleis han og storebror Emil var i naturfag på skulen.

– Vi hadde matte, fysikk og kjemi på vidaregåande. Vi gjekk realfagslinja begge to, svarer Emil.

Nytt hint frå Draken

I podkasten ringer dei også til Victor Sotberg som mange har tippa som Draken, og til Ingeborg Walther som fleire har trekt fram som Bamsen.

Sjølv om dei synest svara til Sotberg og Walther er vanskelege å tyde, blir dei likevel litt klokare på Bamsen.

– Eg trur vi er på Lisa Børud. Så viss det viser seg at vi rett og slett berre blir lurt så er det godt jobba, avsluttar Erna Solberg.

I tillegg mottar Solberg, Melbye og Berrum eit nytt hint. Denne gongen frå Draken. Høyr det nye hintet i podkasten her.

Send inn spørsmål til finalistane

Er det noko du har lyst til å spørje finalistane om? Send inn det du lurer på til maskorama@nrk.no. Da kan det hende at programleiar Sarah Natasha Melbye stiller ditt spørsmål i finalesendinga til Maskorama-podkasten fyrstkomande søndag når ho har kjendisane på besøk.

For kven er Draken, Bamsen og Snømonsteret?

Svaret får vi laurdag kl. 1950 på NRK 1 og NRK TV.