Allereie på førehand vart denne kvelden, måndag 25. september 1972 omtalt som EF-natta.
– Den var spanande fordi den oppsummerte og avslutta ni månader intens og bitter debatt om Noreg skulle vere med i den Europeiske Fellesskap (EF) eller ikkje, fortel medieforskar Henrik Bastiansen, som ser nærare på høgdepunkt frå den 50-årige historia til NRK Fjernsynet for NRK.no.
Den store pila
Oppteljinga vart gjort av datamaskiner frå IBM, og sendt direkte frå NTB til tv-studioa til NRK på Marienlyst.
– Tv-sendinga starta klokka ti på ni om kvelden. Geir Helljesen og Lars Jacob Krogh var programleiarar. Dei sat framfor ein vegg der det var montert ei stor pil som skulle vise resultatet.
- SJÅ UTDRAG FRÅ EF-NATTA:
Då resultata byrja å kome inn var det eit overveldande nei-fleirtal, på over 71 prosent. Men utover natta byrja pila å røyve på seg, over 50 prosent-skiljet, og skifta fram og tilbake.
– Ein augneblink var det ja-fleirtal, i neste nei-fleirtal. Og så mot slutten av kvelden, langt utpå natta, tippa det over til nei-fleirtal att.
Historisk valnatt
Til slutt stoppa pila på 46,5 prosent for, og 53,5 prosent imot medlemsskap i EF.
– Det som er heilt klart etter nattas oppteljing av stemmer er at at Noreg ikkje kjem til å verte medlem av EF, og at regjeringa Bratteli kjem til å gå av, oppsummerte programleiarane då det heile var avgjort.
– Dette var noregs-historie på tv-skjermen. Aldri hadde nordmenn opplevd ei valnatt som likna denne, meiner Henrik Bastiansen.
Fredag 20. august er det 50 år sidan NRK Fjernsynet opna. Les og sjå video frå andre viktige hendingar frå historia til NRK: