NRK Meny
Normal

Gler seg til lukta på Jæren

Sjakk-Ole og kanalvert Hilde-Yvonne er to av NRK-profilane som har sikra seg Noregs kjekkaste sommarjobb. Dei skal vere programleiarar i Sommeråpent. Og alle 16 skal gjere det ingen programleiar har gjort før dei; sende direkte frå perrongen.

Ole Rolfsrud og Hilde-Yvonne Smelror

Ole Rolfsrud og Hilde-Yvonne Smelror skal leie Sommeråpent i Agder og Rogaland; frå Nelaug, Marnardal, Brusand, Sira og Vennesla.

Foto: Thomas Hellum / NRK

Ole Rolfsrud, kjent frå NRK Sportens sjakk-sendingar, ser særleg fram til sendinga på Brusand.

– Eg gler meg skikkeleg, det er utruleg fint på Jæren! Bortsett frå at det ofte luktar bæsj der.

17. mai-tog med traktorer på Tjelta i Sola

17. mai pynta jærbuen 60 traktorar og køyrde i tog. Rett nok ikkje på Brusand, men truleg får Ole Rolfsrud likevel sjå traktorar under sitt besøk i Rogaland.

Foto: Odd Rune Kyllingstad / NRK
Brusand

Brusand i Hå er einaste stopp for Sommertoget i Rogaland.

Foto: Odd Rune Kyllingstad

– Gjer det? Makker Hilde-Yvonne Smelror, frå industristaden Kjøpsvik i Nordland, avslører manglande kunnskap om møkkaspreiing.

– Og så driv dei med traktorpulling, held Ole fram.

– Heime på Sunnmøre er det vanleg å køyre moped når du er 16 år, men på Jæren køyrer dei traktor til skulen.

– Gjer dei? Får eg køyre traktor? Får Hilde-Yvonne tilbodet slår ho til på flekken.

– Dette blir den beste sommarjobben ever!

Sovemaske, knekkebrød og saks

Hilde-Yvonne Smelror og Ole Rolfsrud er eitt av åtte programleiarpar som leier Sommeråpent frå Sommertogets 40 hovudstopp.

  • Nicolay Ramm og Jeanette Platou leiar Sommeråpent frå Rognan, Mo i Rana, Trofors, Grong og Steinkjer.
  • Hans Olav Brenner og Jenny Skavlan: Hommelvik, Støren, Oppdal, Dombås og Åndalsnes.
  • Stian Sandsø og Ida Nysæter Rasch: Vinstra, Moelv, Rena, Alvdal og Røros.
  • Silje Nordnes og Christian Strand leiar Sommeråpent frå Tynset, Elverum, Kongsvinger, Grorud og Eidsvoll.
  • Haddy Njie og Mikkel Niva leiar Sommeråpent frå Gran, Flå, Finse, Flåm og Voss.
  • Martin Giæver og Nadia Hasnaoui leiar Sommeråpent frå Ål, Hønefoss, Stokke, Porsgrunn og Notodden.
  • Ole Rolfsrud og Hilde-Yvonne Smelror leiar Sommeråpent frå Nelaug, Marnardal, Brusand, Sira og Vennesla.
  • Og Rune Nilson og Torfinn Borkhus tek sjarmøretappen frå Bø, Vestfossen, Ås, Råde og Sarpsborg.

Nicolay Ramm tek med seg sovemaske til dei lyse nettene i nord. Haddy Njie har vore ute ei sommarnatt før og pakkar med ulltøy, knekkebrød og makrell i tomat. Nadia Hasnaoui tek med yogamatta for solhelsingar på perrongen. Rune Nilson vil sjekke utsikta frå lokomotivet. Og Hilde-Yvonne Smelror pakkar med saksa for å halde luggen bein.

Hilde Yvonne Smelror

Kanalvert Hilde-Yvonne Smelror jobbar til vanleg åleine i eit studio på Marienlyst. Ho gler seg til å møte folk på tur med Sommertoget.

Foto: Ole Kaland / Ole Kaland, NRK

Innbyggjartal: 150

– Eg trudde eg var den av oss to som kjem frå den minste staden. Kjøpsvik har berre 900 innbyggjarar, seier Hilde-Yvonne. Men nei. Oles heimbygd Brandal har berre 350 innbyggjarar.

Hilde-Yvonne og Ole har si fyrste sending frå Nelaug stasjon 8. august. Aldri høyrt om Nelaug? Nettopp difor gler Ole seg til å ta Sørlandsbanen.

– Kyststripa får all merksemda, og alle har høyrt om Arendal, Risør, Kristiansand og Grimstad. Innlands-Sørlandet er heilt gløymt! Det har Ole tenkt å bøte på.

Nelaug kan skilte med kring 150 innbyggjarar, og ligg i kommunen Åmli i Aust-Agder. Åmli er kjent for Jonas Alaska, bever og volleyball.

Ole og Hilde-Yvonne synest det er ekstra stas å skulle leie Sommeråpent frå Sørlandsbanen, for med unntak av Vennesla (12 820 innbyggjarar.) står det berre småstader på reiseruta deira. Marnardal stasjon ligg i ein tettstad med 200 sjeler, på Brusand er innbyggjartalet 570 og på Sira 800.

– Strålande! seier Ole.

– Tenk så artig om heile bygda kjem på perrongen på Nelaug? Eg er veldig glad for at me sender frå småplassar, for då får me verkeleg møtt folk, seier Hilde-Yvonne, som til vanleg er kanalvert og sit åleine i eit lite studio på Marienlyst.

40 stasjonar og 17 fylker på åtte veker. NRKs sommarsatsing er både ambisiøs og utfordrande.

HEILE RUTA: Sommertogets reiserute sekund for sekund.