– Ein må vere profesjonell og tenkje på jobben ein skal gjere. Men då dei spelte Beethoven var det ikkje mogeleg å sleppe unna. Nokon i salen skreik og vart bore ut. Då forstod eg det verkeleg, seier fotograf Morten Krogvold.
Då minnemarkeringa for 22. juli skulle arrangerast i Oslo Spektrum i august 2011 fekk Krogvold i oppgåve frå NRK å fotografere seremonien.
Aldri vist offentleg
Bileta Krogvold tok frå markeringa har aldri før vore vist offentleg.
– Vi forstod at det var viktig å dokumentere hendinga for ettertida, men det var også viktig at det vart gjort med respekt for dei som opplevde dette. Det er grunnen til at bileta ikkje er blitt publisert tidlegare, seier kringkastingssjef Thor Gjermund Eriksen.
1. juli i år vart bileta overlevert til kulturdepartementet og kulturminister Linda Hofstad Helleland.
– No kan bileta brukast på minnesenteret, eller i andre samanhengar der det er riktig å vise dei fram, seier Eriksen.
Ville fange stemninga
Ifølgje Krogvold var lyset under minnemarkeringa dei mest utfordrande forholda han nokon gong har jobba i.
– Fotografi betyr å male med lys, og det var heilt mørkt i salen eg skulle fotografere, fortalde Krogvold då han overleverte bileta til kulturministeren.
Han vil gjerne at bileta skal visast fram i store kopiar på over ein meter.
– Eg skulle ikkje fotografere dei pårørande, og ville heller ikkje fotografere artistane på scena, for det var ikkje dei dette handla om. Eg ville fotografere stemninga i salen, seier Krogvold.
Fotografen fortel at målet var å få fram kor stor og mektig minnemarkeringa var.
– Eg ville vise kor enorm denne saka var for Noreg, det kunne eg ikkje vise med nærbilete. Eg ville få fram kor høgtideleg og mektig det var, seier Krogvold.
