Beyoncé skreiv Grammy-historie

Den 65. utgåva av Grammy-utdelinga fekk ein røff start for dronninga av pop. Då ho vann den første prisen for beste R & B-song med låten «Cuff it» sat ho fast i kø.

– Beyoncé er på veg, fortalde kveldens vert Trevor Noah før han vitsa om den heftige trafikken i Los Angeles.

«Musikkindustriens Oscar-utdeling» kom seg likevel på beina med eit forrykande show i fullstappa Crypto.com Arena.

Historisk popdronning

I 2021 fekk Beyoncé Knowles sin 28. Grammy-pris, og ho blei dermed den mestvinnande kvinna i prisutdelinga si historie.

For tredje gong i karrieren var 41-åringen nominert i alle dei tre toppkategoriane årets plate, song og album.

I løpet av natta innkasserte ho fire prisar, for beste R & B-låt med «Cuff It», beste dance/electronic-låten «Break My Soul», beste tradisjonelle R & B-oppføring med «Plastic Off the Sofa» og for albumet «Renaissance».

Med allereie 28 prisar under beltet trong ho minst fire prisar for å bli den mestvinnande artisten i Grammy si historie. Beyoncé dytta med det den ungarsk-britiske dirigenten Georg Solti ned frå Grammy-trona, som i løpet av sitt liv fekk 31 prisar.

Då rekorden var eit faktum var det ein overvelda vinnar som tok scena.

– Eg prøver å ikkje bli for emosjonell, men berre ta innover meg denne kvelden, sa Beyoncé.

Pris til bergensar

Jens Christian Liven Isaksen med artistnamnet Isak Swing frå Bergen, er co-produsent på Beyoncé-låten «Break My Soul». Han var dermed nominert i dei tre kategoriane årets album, årets plateinnspeling og beste dans/elektroniske opptak.

I den siste kategorien lukkast han med å vinne ein av dei gjeve grammofon-statuettane.

– Kjempestas, satsar på fleire prisar i løpet av natta, sa Isaksen til VG etter å ha vunne.

Med det blei han femte norske vinnar av ein Grammy-pris, ifylgje Music Norway.

Årets innspeling til noregsaktuell artist

Coldplay-vokalist Chris Martin gav ut prisen for årets innspeling, som gjekk til Lizzo.

Ho blei for alvor kjend for eit større publikum i 2019, og i 2022 har ho gjort seg bemerka med låten «About damn time».

Artisten har brukt sin kjendisstatus til å framsnakke kroppspositivitet, og mana i sin takketale for å akseptere den ein er.

Lizzo fortalde at ho bestemde seg for å vie livet til å lage positiv musikk etter at Prince døydde i 2016.

– Det var på ei tid der positiv musikk ikkje var mainstream. Eg følte meg misforstått, men eg forblei sann mot meg sjølv for å gjere verda til ein betre stad. No er det så mange songar om kroppskjærleik, å vere komfortabel i eige hud – og berre det å kjenne seg jævlig bra, sa ho til ståande applaus.

Ho vann òg pris for beste remiks med same låt. 17. februar skal Lizzo ha konsert i Noreg for første gong, då ho vitjar Oslo Spektrum med «The Special Tour».

Fleire nominasjonar til Noreg

Blant dei nominerte var lydteknikaren og musikkprodusenten frå Skien, Morten Lindberg. Han vann sin første Grammy i 2020 etter å ha blitt nominert heile 28 gonger.

I år var han nominert til tre nye prisar i to kategoriar, men vann ikkje nokon av desse.

For arbeidet på albuma «Picturing the Invisible: Focus 1» og «Tuvayhun — Beatitudes for a Wounded World» var han nominert til to prisar i kategorien for «Best immersive audio album».

Og for arbeidet med «Tuvayhun — Beatitudes for a Wounded World», der dirigent Anita Brevik, Nidarosdomens Jentekor og Trondheimsolistene medverkar, var han også nominert i kategorien «Best engineered album classical».

Før utdelinga i år sa Morten Lindberg til NRK at han hadde ei god kjensle.

– «Tuvayhun — Beatitudes for a Wounded World» er noko av det beste eg nokon gong har vore med å lage. Her føler eg vi har treft på magien. Så i år er følelsen ganske bra.

Les også Zelenskyj talte under Grammy-utdelingen