Elektrikaren Pierre Le Guennec på si side seier at dei 271 verka var ei gåve som Picasso og kona gav til han i 1970. Denne veka så er rettssaka mot handverkaren ferdig. Den endelege domen kjem 20. mars.
Vil ha betinga dom
Både barna til Picasso og statsadvokaten meiner at Le Guennec stal skissene, teikningane og litografia då han installerte eit alarmsystem.
Det er svært få konkrete bevis i denne rettssaka og hovudpåstandane er ord mot ord. Aktor la fredag ned påstand om betinga dom, som betyr at Le Guennec som er 75 år gamal vil sleppe å sone domen om han blir dømt.
(Saka fortset under bildet)
Usignerte verk
Familien til Picasso peikar på at verka ikkje var signert, noko dei seier kunstnaren alltid gjorde før han selde verka eller ein sjeldan gong gav vekk ei teikning eller to om gongen. Dei meiner også at Picasso aldri ville ha gjeve vekk så mange verk på ein gong.
– Gåve frå Jacqueline Picasso
Le Guennec sa i rettssaka på si side at kona til kunstnaren gav eska til han og at Picasso sjølv godkjende gåva. Den mystiske boksen slo ned som ei bombe i kunstverda i 2010 då Le Guennec kom til Picasso-familien med kunstskatten og fekk stadfesta a at dei udaterte og usignerte verka var ekte.
Kunstavisa The Art Newspaper skriv at Le Guennec skal ha sagt at han hadde heilt gløymt av pappeska med dei krøllete papira og at han no ville vite om dei var verdt noko.
Familien til Picasso meiner at Le Guennec på 70-talet samarbeida med kunstnaren sin sjåfør om å stele verka og vente til eit passande tidspunkt i ettertid med å selje verka.