Dei siste åra er over 20 norskutvikla tv-format eksportert til utlandet, og blitt laga i nasjonale versjonar i fleire europeiske land, i USA og i Kina. Det viser tal frå norske tv-kanalar og produksjonsselskap.
Administrerande direktør Espen S. Huseby i Nordic World merkar auka etterspurnad etter norske format.
Foto: Nordic WorldAdministrerande direktør Espen S. Huseby i Nordic World seier dei merkar ein auka interesse for norske format:
– Interessa har utvikla seg eksplosivt. Dette skuldast først og fremst drama, som alle skal ha no, Men dette har også smitta over på alt som er av kreativ utvikling, og vi ser no at det er stor interesse for norske format på tv-messene.
Faktabasert underhaldning
Det er særleg faktaunderhaldning utlandet spør etter frå Norge. Dette er program der ein blandar fakta og underhaldning. Som i NRK-programmet «Ikke gjør dette hjemme», som har fått avleggarar i seks land, så langt.
- Les:
Dette er ein sjanger der det er enklare å stikke seg ut samanlikna med klassiske underhaldningsformat, seier utviklingssjef Ole Hedemann i NRK:
– Lagar du eit nytt gameshow eller ein talentkonkurranse, er det vanskeleg å stikke seg ut samanlikna med alle dei andre formata som finst. Men med ein original vri på det som blir kalla factual entertainment, er det lettare å bli lagt merke til.
Nye marknader
Utviklingssjef Ole Hedemann i NRK meiner det er enklare å lukkast med eit faktabasert underhaldningsprogram.
Foto: Hege Bakken Riise / NRKDet siste året har også engelskspråklege land fått auga opp for norsk tv. Channel 4 i England har laga «Datoen», USA Network laga ei nyinnspeling av dramaserien «Øyevitne» i fjor haust. Denne hausten kjem etter planen den amerikanske versjonen av «Skam», og til neste år skal den amerikanske versjonen av «The Stream» på lufta på NBC, ifølge TV 2.
- Les:
Det er Monster som i samarbeid med TV 2 og Little Hill har utvikla «The Stream»-formatet. Formatmanager Eva Marie Uddu i Monster er spent på korleis den amerikanske versjonen blir:
– Det er historisk at eit norskutvikla underhaldningskonsept skal på lufta i USA. Vi er involvert, men er spent på korleis dette blir. I NBC sit det folk som har arbeidd med store konsept som «The Voice» tidlegare. No skal dei ta vårt relativt vesle konsept ut til den store marknaden.
– Vanskeleg å tene pengar
Men norske produsentar blir ikkje særleg rike av programutviklinga. «Vil du bli millionær» er eitt av dei største tv-formata verda har sett. Det er produsert i rundt 150 land, og har gått i fleire sesongar. Det er langt fram dit, seier Uddu.
– Dersom du har eit program som kan gå i mange år i mange land, kan du tene gode pengar. Men det er vanskeleg. Det blir stilt høge krav til ideen. Men får du det til, då er det mykje pengar å tene.
