Vegard Bjørsmo (19), gii lea nuoramus oasseváldi dán jagáš Stjernekampgilvvus, lea olu rámiduvvon, sihke duopmáriin ja maiddái musihkkaárvvoštalliin.
Dássážii lea son birgen hirbmat bures buot šáŋŋeriin.
– Dovddan ahte lei dego ipmilvuohta mii lei dán lanjas, lasihii Maria Mena.
Áigu čájehit ahte sápmelaš maid máhttá
Vegard lea beassan vásihit ahte artistaeallin sáhttá leat hui gelddolaš. Dat sáhttá šaddat eallin gos leat ollu vejolašvuođat.
Vegardii lea stuora gudni leat mielde dán gilvvus.
– Mun duođai áiggun čájehit ahte mii sápmelaččat maiddái sáhttit ja máhttit, dadjá Vegard.
Bjørsmo ráhkista sihke dánsut, neavttašit ja lávlut. Danne lea ge oahppin Musihkkateáhterallaskuvllas.
Dán áigge son lea doppe iđitbeaivvi, ovdal go doapmala Stjernekamp geahččalemiide.
– Mun lean álo háliidan leat mielde sámi musikála buvttadeamis ja hábmemis, muitala Vegard Bjørsmo.
Son lea fuomášan ahte Beaivváš sámi našunálateáhter lea juo máŋga musikála ráhkadan.
De gal soaitá fertet plánaid rievdadit.
– Amma hal mun de sáhtán leat mielde dan vuosttaš sámi musikálas mii vuovdá hui stuorrát, leaikkastallá Vegard.
- Loga maid:
– Sáhttá dovddus musikálas oažžut rolla
Elisabeth Andreassen lea eallán musihkain dan rájes go lei 20 jahkásaš. Dan seamma agis mas Vegard Bjørsmo lea dál.
Andreassen gal diehtá man birra hupmá go dadjá ahte geaidnu dáiddamáilmmis sáhttá leat moalkái ja váttis.
– Jus Vegard Bjørsmo háliida lihkostuvvat musikálanástin, de gal ferte johtit nu ollu auditioniin go vejolaš, dadjá son.
Andreassen lea dán áigge ieš mielde dovddus musikálas «Chess». Son neavttaša duopmára - The arbiter.
Son diehtá ahte buvttadeaddjit dihtet áigá juo makkár olbmo háliidit rollaide.
– Ja dál go Vegard ain lea nuorra, de gal sáhttá vaikko dovddus «West side story» musikálas oažžut rolla. Go dien musikálai dárbbašit aivve nuorra neavttáriid, muitala son.
- Geahča:
Teáhterhoavda illuda
– Ihána buorre!
Nu dadjá Rolf Degerlund, Beaivváš teáhtera hoavda, go gullá Bjørsmo jurdagiid sámi musikála birra.
– Sápmi dárbbaša ođđa jienaid geat muitalit dáidaga bokte daid ollu muitalusaid mat eai leat vel muitaluvvon, dadjá Rolf Degerlund.
Son bovde seammás juo Bjørsmo gáfeguossái.