Son lea dán jagáš Stjernekamp-gilvvuid nuoramus artista, ja áigu vuosttaš prográmmas juo čájehit gosa son gullá. Dan son dahká Mari Boine lávlagiin «Elle».
Dát lávlla su mielas čájeha man lossat dat lea go muhtun dovdá ahte su duogáš ii leat dohkkehuvvon. Nu go mat sámi álbmot lea máŋgii vásihan.
- Loga:
Nanu duogáš
19 jahkásaš Vegard lea bajásšaddan bearrašis man sáhttá dadjat máŋggakultuvrralaš bearašin. Eadni lea riegádan Filipiinnain, áhčči lea norgalaš, áddjá lea Englánddas riegádan ja áhkku lea kárášjohkalaš.
– Dalle go ledjen mánná, de ledje muhtun eará mánát geat dadje ahte sii leat eanet sápmelaččat go mun, muitala Vegard.
Muhto Vegard dovdá iežas dušše fal sápmelažžan. Ja háliida rámidit iežas eatni. Eadni, guhte riegádii nuppe bealde máilmmi, lea dat gii eanemusat lea nannen iežas mánáid sámevuođa.
– In mun goit dovdda Filipiinnaide gullevašvuođa. In máhte sin giela ge, dadjá Vegard go muitala iežas oaiviliid dán fáttás.
Eadni lea adopterejuvvon mánnán ja bajásšaddan sápmelažžan Kárášjogas, ja ii son goit leat filipiinnalaš Vegarda mielas. Sii leat sápmelaččat, nu go buot eará sápmelaččat Kárášjogas.
- Geahča go Vegard guoimmuhii SGP 2019:
Juo, Vegard lea sápmelaš
Eatni namma lea Emily, ja dovdo ahte Vegard lea rábmái go hupmá su birra. Muitala ahte eadni lea sámegieloahpaheaddji, ja ahte eatni garra barggu dihte lea Moskaluovttas sámi giellaguovddáš.
– Juo, Vegard gal lea sápmelaš, duođašta Emily. Son dat bijai Vegarda sámi mánáidgárdái ja sámegielat skuvlaluohkkái. Go Vegard han lei dego eará mánát Kárášjogas, humai sámegiela ja stoagai eará sámemánáiguin.
Ii Emily ge dovdda ahte son ieš ge gullá eará sadjái go Sápmái. Riegádanbáiki ii mearrit gosa olmmoš dovdá gullevašvuođa, muhto baicca dat biras mii hábme du olmmožin.
– Sávvamis eadni sádde liegga ja buriid jurdagiid lávvordat eahkeda, dadjá Vegard. Go mieđiha ahte son lea muhtomin nu balus ahte ii muitte šat ii maidege.
Sámevuohta galggašii šaddat lunddolažžan
Vegard Bjørsmo váccaša hui lunddolaččat feaskáriin ja studios gos Stjernekamp sáddejuvvo. Muitala ahte dá lea dat áidna maid son háliida eallimis; Lávlut ja leat lávddi alde. Oidnot ja gullot.
Son lea oahppi skuvllas gos lávlun ja dánsun lea árgabeaivi.
– In mun goit sáhte oaidnit ahte mun galggašin dahkat maide eará, dadjá Vegard. Musihkka lea dehálaš. Dat lea su varas.
Dál Vegard sávvá ahte son ja eará nuorra sámi artisttat sáhttet leat mielde váikkuheame dasa ahte sámevuohta šaddá lunddolažžan riikamediain. Ahte olbmuid mielas lea dábálaš diŋgan oaidnit sápmelaččaid ja gullat sin giela go gehččet TV, eai ge dovdat ahte dát lea juoga mii lea amas sidjiide.
Dovddus artista ja rádiobargi Alex Rosén rámida nuorra sámebártni. Dadjá ahte son liiko Vegarda jitnii, ja ahte son lea garra gilvaleaddji sidjiide earáide, vaikko vel lea ge nuorra.
– Vegard gal joksá guhkás dieinna attáldagain, go son han lávlu dego eŋgel, dadjá Rosén.
Dá leat dán jagáš Stjernekamp artisttat ja sin lávlagat vuosttaš sáddagis:
- Alex Rosén: You Can Count on Me - Sammy Davis jr.
- Anita Hegerland: Moonlight Shadow - Mike Oldfield
- Emil Solli-Tangen: To Where You Are - Josh Groban
- Sandra Lyng: Svag - Victor Leksell
- Vegard Bjørsmo: Elle – Isák (Mari Boine)
- Odd Einar: Hard To Handle - Otis Redding
- Myra: Super Bass - Nicki Minaj
- Knut Marius Djupvik: With a Little Help from My Friends - Joe Cocker (The Beatles)
- Hege Øversveen: Don't Put Dirt On My Grave Just Yet - Nashville Cast ft. Hayden Panettiere
- Ingeborg Walther: Golden Ticket - Highasakite