Čálli: Anna Anita Hætta Guttorm
- Romsa lea Dávvi-Norgga musihkkaoaivegávpot, ja áidna girjjálašvuođafestivála dáppe lea Ordkalotten. Danne ávvudan hirbmasit go doalut dál álget ja mii beassat lágidit deaivvademiid dávviguovlluid girječálliiguin, lohká stivrrajođiheaddj Marry Ailonieida Somby.
Ruoššabeale dálááigge girjjálašvuohta lea fáddán dán jagáš Ordkalottenis. – Duogáš dasa lea go Davvi-Norggas lea lagaš oktavuohta Ruoššain, nugo ealáhusovttasbargu riikkarájáid rastá. Lea seammás dehálaš nannet kultuvrralaš ovttasbarggu, vai álbmogiid gulahallan doaibmá vel buorebut, lohká Somby.
Ordkalotten lea dán jagi ovttasbargan Norgga olgoriikkadepartemeanttain, ja leamaš maiddái njuolga oktavuohta olgoriikkaministtariin Jonas Gahr Størein. Norgii lea dehálaš nannet dáiddalaš ja kultuvrralaš ovttasbarggu Ruoššain, nu ahte petroleum- ja birasgáhttenáigumušat ollašuvašedje. -Oažžu lohkat ahte oljoruđat dál goaikkehit maiddái kultuvrii, nugo Ordkalottena oktavuođas, ja dat lea buorre, mieđiha Somby.
Sámi Girječálliid Searvvis (SGS) lea stuorra váldi Ordkalotten festiválas dán áigái, earret stivrrajođiheddji Marry Ailonieida Somby, lea maiddái Sigbjørn Skåden mielde njunnožis lágideame doaluid.
Girječállit geainguin beassat eanet oahpásmuvvat Ordkalottenis leat nugo Elena Gabova, Andrej Kurkova, Torvald Steen, Musa Mutajeva, Natalia Kopsova, Elena Kozolova, Aleksandra Marinin, Jostein Gaarder, Synnøve Persen ja Herbjørg Wassmo.
- Beaggá maid ahte Leo Tolstoj mánáidmánná lea boahtime festivála galledit, giktala Marry Ailonieida Somby. Bekkán Ruošša girječálli ja filosofa Leo Tolstoj čálii girjjiid nugo ”Krig og fred” (1869) ja ”Anna Karenina” (1877), mii álgá dainna dovddus cealkagiin ”Buot lihkolaš bearrašat leat seammaláganat, muhto vártnohis bearrašat leat lihkoheamit iešguđet láhkai.”
Duorastaga čákčamánu 27.beaivve lea rahpankonsearta Romssa symfoniijaorkestera bokte ovttas poehtain Synnøve Perseniin. Dat lágiduvvo Verdensteateris.
Eanet dieđut: www.ordkalotten.no
Ovddit jagiid fáttát :
2000: Lars Levi Læstadius
2001: War and Peace ja Lars Berg seminára
2002: Multidáiddár Nils Aslak Valkeapää
2003: Cora Sandel- Tromsø-Paris tur/retur
2004: Når ordet er truet (Go sáni áitet)
2005: Polarisert (polariserejuvvon)
2006: Kokoro-fokus på Japan (Japána girjjálašvuohta)