Ienemus oasse sámijs Nordlánda fylkan årru stádajn.
Dav de Nordlánda fylkasuohkan vielet, ja la prosjevtajn «Samer i by» álgadam mij galggá gåvådit hásstalusájt sábmen stádan årrot.
Sihtá ietjájduhttet
Fylkaráde Nordlándan Tomas Norvoll nammat aj politihkka ja dåjma sáme álmmugij li ienemusát læhkám iemelágásj æládussaj ja iemelágásj årrom- ja viessomvuogijda. Valla dav de sihtá ietjájduhttet.
– Dat guosská varresvuodadievnastusájda ja giellaj, valla aj æládussaj ja ietjá suorgijda mij mielav lulu båktet. Le gus sierralágásj oase majna bierrip barggat hiebadahtátjit dan oassáj mijá álmmugis, gatját Fylkaráde.
- Lågå aj:
Åhtsål sáme værmádagáv
Fylkaoajvvestádan årru gålmåmánájieddne Rakel-Irén Pedersen gejn li hásstalusá mij guosská stádan årrot, ålggolin sáme guovddaguovlo. Sån åhtsål sáme værmádagáv, ja hásstalusájt duosstu mij giellaåhpadussaj guosská.
– Muhttijn la de riek låssåt, ja dåbddu dagu aktu lav. Iv diede jus dal ienep fálaldagá gávnnuji dánna. Mån lav giellaj tjalmostam, dav ruoptus oadtjot. Gássjel la gal læhkám gielav almma láhkáj oahppat.
Varresvuohta la akta suorgge dán prosjæktaj, ja sámegiella la aj suorgge majt fylkasuohkan la vieledam.
– Vierttip suohkanij aktisattjat barggat gåktu dilijt láhtjet nav vaj dahkkár fálaldagá sámegiellaj aj fáladuvvá, javllá Fylkaráde Tomas Norvoll.
Li miellusa dán prosjæktaj
Ja akta stádasuohkanijs fylkaráde sihtá dåjmajt jåhtuj oadtjot la Áhkánjárgan gånnå oasse politihkkárijs la mielos dán prosjæktaj.
– Mij lip miellusa dási. Diedon hæhttup dilijt láhtjet divnajda dán sebrudagán, dánna aj. Åvddålij guovlluj dal gehtjav dal, ja vuordáv dal mij dal dájna tjuovvu ja mij dal dan tjállagin tjuodtju, javllá Rune Edvardsen gut la Áhkánjárga stádastivrran.
- Lågå aj: