Sárá Márja Utsi (29) orru Deanus Finnmárkkus ja lea boazodoalli.
Vuossárgga eahkedis jearai son stáhtaministtar Jonas Gahr Støres el-fápmohuksemiid ja bieggafámu birra boazoguohtonguovlluin stuorra álbmotčoahkkimis Romssas:
– Mun háliidan diehtit áigu go ráđđehus viiddidit bieggafápmoindustriija, vaikko mii gal biehttalit?
Dás oainnát Sárá Márja sáddagis:
Son háliida diehtit áigu go ráđđehus viiddidit bieggafápmoindustriija, vaikko boazosápmelaččat eai áiggo nu dahkat. Ja leatgo sii gergosat rihkkut álbmotrievtti nugo Fovse-áššis, ja soaitá vel oažžut ođđa Álttá-ášši.
– Mii galgat doahttalit buot min riikkaidgaskasaš geatnegasvuođaid. Mis leat vuođđolágas nannejuvvon olmmošvuoigatvuođageatnegasvuođat sámiid vuoigatvuođaid hárrái doaimmahit iežaset árbevirolaš doaimmaid – boazodoalu. Fovse-ášši lea muittuhus dasa, lohká Støre.
– Heaittihit boazodoalu?
Sihke ráđđehusa fápmohuksenprošeavttat ja boazodoallu gáibidit stuorra areálaid, muitala Utsi ovdal go jearrá stáhtaministtar Støres:
– Leago din taktihkka heaittihit boazodoalu?
– Ii mange láhkai, vástidii Støre jođánit.
– Boazodoallu lea oassi Norgga kultuvrras. Mis leat riikkaidgaskasaš geatnegasvuođat sámiide, go leat eamiálbmogat. Mun lean viissis das, ahte buorre gulahallamiin ovttas mii nagodit oažžut eanet elfámu ja boazodoalu eallit bálddalagaid, lohká son.
Støre Erna Solberga (O) bálddas eahkeda álbmotčoahkkimis Romssas.
Foto: Rune Stoltz Bertinussen / NTBBallu
Gáržžes áiggi geažil ii beassan Erna Solberg vástidit Utsi gažaldagaide.
NRK deaivvada ovddeš stáhtaministariin maŋŋel sáddaga gullat maid son oaivvilda bieggafápmohuksemiid birra boazoguohtunguovlluin.
– Ráđđehus lea geavahan menddo guhkes áiggi ovdalgo álggahuvvui duohta gulahallan Fovse-áššis. vástida Solberg.
– Áddetgo Sárá Márjá Utsi fuolastuvvama?
– Juo, muhto go orru Finnmárkkus, de berre maid fuolastuvvat dainna jus ii oaččo doarvái elrávnnji.
Erna Solberg lohká mávssolažžan, ahte Norggas lea doarvái elrávdnji.
Foto: Bernt Olsen / NRK– Standard-vástádus
NRK deaivvada Utsiin sáddaga maŋŋá. Son muitala ahte lei gelddolaš vásáhus, muhto ii hirpmástuvvan Støre vástádusaide.
– Dat lesjš oalle standard vástádusat, ja mun ledjen maiddái dasa ráhkkanan mo mun galgen vástidit jus son vástida dábálaš vástádusaiguin, muitala Utsi.
Utsi lasiha ahte gažaldat hukset el-fápmorusttegiid boazoguohtonguovlluide, lea hui persovnnalaš sutnje.
– In dieđe maid galggan dadjat, dat lea nu stuorra ášši ja dat buktá nu ollu dovdduid, loahpaha son.
