NRK Meny
Normal

Vassvik:– Namma lea čállon boastut

«Dávvin» lea evttohuvvon sámegielnamman Romssa ja Finnmárku oktasaš fylkagildii. Oallugat moitet nama.

Ragnhild Vassvik

Dávvin nama olu sápmelaččat moitet sosiala mediain. Dál lohka Finnmárku Fylkkasátnejođiheaddji Ragnhild Vassvik ahte eai áiggo geavahit Dávvin nama go lea boastut čállon ja ii leat grammáhtalaččat riekta.

Foto: Máret Eli Buljo / NRK

Romssa ja Finnmárku fylkkagielddat leat šiehtadallán movt oktiičaskiin galgá čađahuvvot, sii vuolláičálle šiehtadusa mas earet eará meannudedje ođđa sámegiela nama, «Dávvin». Fylkka sáhttá nai gohčodit Romssa ja Finnmárkku fylkan.

Oallugat sosiála median cuiggodit «Dávvin» nama ja imaštallet manne dakkár sátni lea mearriduvvon namman mii ii oba gávdno ge sámegielas ja sáni ii sáhte sojahit riekta.

Norgga sámediggepresideantta Aili Keskitalo lohka ahte dán nama ii leat Sámediggi evttohan ja ii leat riekta čállon.

– Dát namma ii leat dat maid Sámediggi lei evttohan. Muhto ovdal go Stuoradiggi loahpaloahpas mearrida nama, de galget gulahallat Sámedikkiin. lohka Keskitalo.

Ansiktsbilde av Aili Keskitalo

Norgga sámediggepresideantta Aili Keskitalo lohka ahte Dávvin nama ii leat Sámediggi evttohan ja ii leat riekta čállon.

Foto: Per Inge A. Åsen / NRK

Sámediggepresideantta lohka sii evttohedje Romssa ja Finnmárku fylka.

Eai vuoruhan iskkat sámegielnama

Finnmárku Fylkkasátnejođiheaddji Ragnhild Vassvik lohka eai áiggo geavahit «Dávvin» nama go lea boastut čállon ja ii leat grammáhtalaččat riekta.

– Mii leat meaddán, hoahpuid siste eat muitán gulahallat sámi giellačehpiiguin. Lei olu bargu ovdal go vuolláičáliimet šiehtadusa ja danne eat muitán iskkat leago dá rievttes sámegielnamma, lohka Vassvik.

Ragnhild Vassvik

–Dál mii fertet gulahallat sámegiel giellačehpiiguin ja maiddái sámi álbmogiin makkár namma livčče heivvolaš, lohka Ragnhild Vassvik.

Foto: NRK

Vassvik lohka sii áigot dál divvut nama dahje jo mearridit áibbas ođđa sámegielnama fylkii.

– Dál mii fertet gulahallat sámegiel giellačehpiiguin ja maiddái sámi álbmogiin makkár namma livčče heivvolaš, lohka son.

Kvenagillii lea fylkka namma «Ruija», ja danin háliidivčče son sierra sámegiel nama.

– Romssa ja Finnmárkku fylkan gal sáhtašii gohčodit, muhto livčče hui fiinnis jus gávdnošii sámegillii vuogas sátni, lohka fylkkasátnejođiheaddji.

–Mii eat evttohan «Dávvin»

Finnmárkku Olgešbellodaga joavku evttohii golggománus čoahkkimis Davvin nama. Ja Ellen Kristine Saba lohka ahte sátni ferte leat boastut čállon.

– Vuosttažettiin lea somá gullat go Davvin nama leat válljen. Muhto «Dávvin» ii leat riekta čállon. Ovdal go dohkkehuvvo de fertejit riekta čállit dan nama. Ii joavku hálddaš sámegiela, ja danne dáidá leat boastut šaddan, lohka Saba.

Ellen Kristina Saba smiler utenfor kommisjonsmøterommet

Finnmárkku Olgešbellodaga joavku evttohii golggománus čoahkkimis Davvin nama. Ja Ellen Kristine Saba lohka ahte sátni ferte dál leat boastut čállon.

Foto: Carl-Gøran Larsson / NRK

Eai ovdamunit sápmelaččaide

Norgga sámediggepresideantta Aili Keskitalo lohka dat lea váttis diehtit buktá go ođđa soahpamuš ovdamuniid sápmelaččaide.

– Áidna ovdamunni lea ahte dat šaddá stuorát, ja de soaitá leat vejolaš bidjat stuorat fámuid sámi áššiide, lohka Keskitalo.

Sámediggi galgá šiehtadallát ođđa fylkkain ja dasa leat sus vuordámušat.

– Mus leat stuora vuordámušat šiehtadallamiidda, lohka sámediggepresideantta.