– Mu mielas gal lei hui somá gullat dan, dadjá Sara Vuolab NRK:i.
Nu go lea dáhpin leamašan 2001:a rájes, de doalai sámediggepresideanta sártni NRK1:žis ođđajagimánu 1. beaivve.
Mannan čavčča válljejuvvui Silje Karine Muotka (46) presideantan, ja sárdnidii olles riikii vuosttas geardde.
Váikko olu sápmelaččain ja sámi servvodagas leat iešguđetlágan hástalusat ja gillámušat, de presideanta deattuhii doaivaga sártnistis.
– Doaivva lea min eallima bálggesčuovga, son álggahii.
– Sámis leat olusat geat leamaš duostilat
Ja oassin dás, lea maid eanet rabasvuohta sámi servvodagas. Lea šaddan álkit hállat tabuáššiid birra, dego veahkaválddi, ovdagáttuid ja seksualitehta, presideanta celkkii.
Dán oktavuođas gesii ovdan dan maid 25 jahkásaš Sara Kristine Vuolab lea dahkan.
– Sámis leat olusat geat leamaš duostilat. Okta sis lea nuorra Kárášjot-nisu, Sara Kristine Vuolab, gii čakčat oaččui Tabubálkkašumi. Divttaidisguin son govve psyhkalaš dearvvasvuođa, ja son dahká dan eatnigillii. Dan láhkai son rasttilda maiddái gielalaš rájáid ja hástala min eanet ravasvuhtii, dajai Silje Karine Muotka.
– Psyhkalaš dearvvašvuohta lea oktasaš fáddá
Mojinjálmmiid čohkohallá Sara go gullá maid presideanta dadjá.
– Jurddašin dan ahte go presideanta lea lokten mu barggu dainna girjjiin, ja psyhkalaš dearvvašvuođa, de čájeha ahte dá lea ášši maid son boahtá gozihit, vástida Sara go jearrat makkár boahtteáigge doaivagiid presideantta cealkámuš buktá.
– Dat addá munnje hui buori dovdduid ja doaivaga. Ii han dát leat dušše mu fáddá, dat psyhkalaš dearvvašvuohta, dat han lea min buohkaid oktasaš fáddá mii guoská buohkaide. Nu ahte dat lea hui deaŧalaš, ja dasa galggašii bidjat hui olu deattu, joatká Sara.
Su mielas lei hui somá gullat sártni, ja lohká dan addit sutnje buori iešdovddu.
Sara muitala ahte son doalaha rabasvuođa vuosttamužžan iežas dihtii.
Seammás sávvá maid ahte nagoda veahkehit earáid earet eará girjjistis bokte.
– Danin go dovddan ahte lea áibbas dárbbašlaš munnje muitalit mo mus lea. Muhto dan ahte dat dieđusge veahkeha earáid, dat lea leamašan eambbo dego dakkár bonus. Oainnat go mun jáhkán ahte dat rabasvuohta ii leat seammá dábálaš buohkaide nu go dat lea munnje. Ahte earát gávdnet veahki das, dat gal lea beare buorre, son dadjá.
Dán muitalusa Sara Vuolab birra almmuhii NRK 2018:s.
– Sii eai galgga eambbo šat gillát
Sámediggepresideanttas lei maid čielga diehtu Fovsen sápmelaččaide.
Son namuhii Arvid Jåma ja Fovsen Njaarke badjeolbmuid, geat badjel guoktelot jagi leat rahčan kievrrabuid vuostá, buot dásiid politihkalaš fámuid, ruhtafámuid ja vel stáhta vuostá ge.
– Sii eai galgga eambbo šat gillát. Dán áššis lea sáhka min buohkaid vuđolaš riektesihkkarvuođas.
– Norgga eiseválddit fertejit dovddastit ja njulget dáid duođalaš boasttuvuođaid, dajai Muotka.
Presideanta navdá ahte ođđa láhka mii geatnegahttá buot Norgga eiseválddiid gulahallat Sámedikkiin, sáhttá hehttet sullasaš áššiid dáhpáhuvvamis.
– Mun dieđán ahte go min oainnut ja hástalusat šaddet dovddusin nu árrat go vejolaš, de mii sáhttit ovttas hehttet stáhta rihkkumis álgoálbmotvuoigatvuođaid. Dat addá buoret bohtosiid, sápmelaččaide ja Norgii ge riikan, Muotka dajai.
– Addán buriid kulturvásáhusaid
Presideanta dovddahii ilu ja doaivagiid sámi kultuvrra ja dáidaga geažil.
Su mielas rahpá dáidda olbmuid miela ja sáhttá duddjot diehtoáŋgirvuođa, dohkkeheami ja daid neavvuid maid mii dárbbašat birgen dihtii balus das mii lea amas.
– Eai leat olusat addán midjiide nu ollu buriid kulturvásáhusaid go Sámi nášunálteáhter Beaivváš. Njealljelot jagi leat sii buktán máilmmikultuvrra Sápmái, muhto sii leat maiddái gaskkustan min iežamet muitalusaid lávdái ja máilbmái. Lea deaŧalaš ahte dál duohtandahkko ođđa teáhterviessu, ruoktun min iežamet nášunalteáhterii, celkkii.
Ja presideanttas leat vuordámušat ođđa jahkái.
– Muhtumin doaivva čuovgá šearradit ja čielgasit midjiide. Dat sáhttá min movttiidahttit ja addit midjiide ođđa vuoimmi. Eará háve dat lea nu guhkkin ahte seavdnjadas čiehká buot čuovgga. Ođđa jahki mearkkaša ahte áiggit čuvggodit ja mii sáhttit jáhkkit ahte bohtet buoret beaivvit ja ođđa álgu, dajai Muotka.
Dás sáhtát lohkat olles sártni:
På norsk: