Skïereden aelkieh seedtedh

Aerebi dan jaepien NRK Sápmi bievni saemieh Rørosen dajvesne orre radijove jïh nedtefaaleldahke dan tjaktjen åadtjoeh. Daelie riejries ahte skïereden askesne faaleldahkine aelkieh.

Aino og Per Magne

SKÏEREDEN AALKA: Nea Radijoven orre faaleldahke skïereden askesne båata. Guvvesne Aino Linnea Danielsen jïh redaksjovneåejvie Per Magne Moan.

Foto: Marit Manfredsdotter / Nea Radio

Aajege saemien gïele jïh maahtoejarnge, Rørosesne, ektiebarkoe Nea Radijovine aalkeme, jïh daate lea voestes aejkien goh saemieh Rørosen dajvesne åadtjoeh åarjelsaemiengïele dovne nedtesne lohkedh jïh voeneradijovesne govledh.

Nea Radijoven redaktøøvre Andreas Reitan jeahta, dah aerebi pryøveme dagkeres faaleldahke almetjide vedtedh, mohte eah dam buektiehtamme. Dïhte aaj jeahta stoerre haesteme orreme gïeletjiehpies almetjh gaavnedh.

> Lohkh aaj: Aajege edtja åarjelsaemien gïele faaleldahkem vijriedidh

Håhkesje staeries sjædta

Reitan jeahta haesteme gujht sjædta, mohte hååhkesje daate dorjesem mah daelie maehtieh faaledh staeries sjædta. Jïh dïhte aaj veanhta, mænngan dam evaluereme, jïh jis beetnehvierhtieh åadtjoeh, dle geerve neajhkedh daejnie dorjesine jåerhkedh.

Nov gujhth haesteme sjædta

Andreas Reitan, Nea Radio
Aino Linnea Danielsen

JOURNALISTE: Aino Linnea Danielsen edtja Nea Radijovesne barkedh.

Foto: Marit Manfredsdotter / Nea Radio

Mohte ij leah barre aelkedh radijove seetedh, akte journaliste aaj daerpies! Dïhte lea Aino Linnea Danielsen mij edtja Nea Radijovesne barkedh, jïh dïhte edtja dïedtem utnedh ahte bielie tæjmoe radijove våhkosne sjædta.

Saadtegide maahta Selbuen, Tydalen, Røroesen jïh Håltålen tjïeltine govledh.