Aajege- gïele jih kultuvre jarnge, Rørosesne, Plassesne, barkoeminie edtjieh åarjelsaemien gielem nænnoestidh jih evtiedidh. Dah leah gellie gïeleprosjeekth syøkeme, guktie sijhtieh saemien gïele faaleldahkem maanide ,noeride , geerve jih voeres almetjidie faaledh.
Jijtjen åarjelsaemien radijove jih nedte faaleldahke.
Daan tjaktjen dellie saemieh Plassjen dajvesne jijtjen åarjelsaemien radijove saadtegem åadtjoeh. Aajegen åejvie Toini Bergstrøm tuhtjie daate lea gieltegs prosjeekte.
Aajegen åejvie Toini Bergstrøm.
Foto: Mariela Idivuoma/NRK– Daate lea ektiebarkoeprosjeekte Nea radijoven ektesne, radijove jih nedte faaleldahkem buektiehtidh. Daate lea orre prosjeekte mij gieltegs sjædta, Bergstrøme jeahta.
Daan tjaktjen edtjieh dah radijove saadtegh aelkedh.
– Ussjedibie, bielie tæjmoem våhkosne seedtedh. Ij leah barre saernieh, jeatja aamhtesi bijre aaj, studijove guessieh, tekste lohkeme, jih jijnje jeatja maam radijovesne maahta darjodh, jih aaj nedte aamhtesh sjædta, Bergstrøme bievnede.
Man vihkeles dagkeres gïele prosjeekth dijjese?
–Daate lea joekoen vihkeles. Tjoeveribie åarjelsaemien gïelem lieredh jih bååstede vaeltedh jih saemien gïelem vijriebasse evtiedidh jih vihkeles aaj dihte saemie jih saemiengïele daan Plassjen dajvesne vååjnoe, Bergstrøme jeahta.
Saemiedigkie Aajegen gïele prosjeektide dåarjome.
Aajege ussjede nielie gïele prosjeekti gujmie barkedh . Gadtsegarhkh gïele tjåanghkoe aarh-skuvle jih vuelemes daltese skuvlemaanide. Gaavnedibie Rørosesne, sijjie gusnie geerve jih voeres almetjh edtjieh tjåangkanidh jih guktie edtjieh dåemiedimmie spielem/ rolle spielem nuhtjedh jih evtididh gosse saemien gïelem edtjieh øøhpehtidh. Saemiedigkien raerijen Ann-Mari Thomassen tuhtjie daerpies jih åarjelsaemien gïelem Røros saemien dajvesne nænnoestidh.
Saemiedigkien raerijen Ann-Mari Thomassen.
Foto: Dan Robert Larsen / NRK– Daate hov vihkeles barkoe, mejnie Aajege giehteleminie. Dagkeres revitaliseringe barkoe. Dagkeres gïele prosjeekth vihkeles dåarjodh, gåessie ij dihte Rørosen tjïelte ennje meatan daan guektiengïele reereme dajvesne, Ann-Mari Thomassen jeahta.
