Káre Máret muitala rahpasit ahte su 11 jahkásaš nieiddažis lea korona

– In ipmir manne olbmot čiegadit dan, oaivvilda son.

Mannan vahkku čájehii koronaiskkus ahte su 11 jahkásaš nieiddažis lei korona.

De lei eadni Káre Máret jođán almmuhit dán sosiála mediain, Su mielas lea riekta dahkat dan vai nagodit guorrat dávdda njoammuma.

– Olbmot berreše leat rahpasat ja muitalit jus lea njommon korona sidjiide, vai earát dihtet gos don leat leamaš, oaivvilda son.

Bearaš orru Kárášjogas gos lea ollu njommon korona dan maŋemus vahkku.

Eai gidde

Sotnabeaivve dieđihuvvui ahte Kárášjogas lea 38 olbmui njommon Korona. Okta sis lea gártan buohccivissui.

– Mii oaidnit ahte njoammu ollu nuoraid ja mánáid gaskkas, dieđiha ráđđeolmmái Kurt Maurstad.

Gielddas lea leamaš čoahkkin dearvvašvuođa eiseválddiiguin, oažžun dihte rávvagiid movt dustet dán dili.

Gieldda dearvvašvuođafágalaš ráđđeaddi, Heidi Boine muitala ahte virus njoammu sin gaskkas geat eai leat boahkuhuvvon, namalassii mánáid gaskkas geat leat vuollel 12 jagi.

– Vaikko dál boahkuhit mánáid geat leat gaskkal 12 ja 15 jagi, de eai leat nu ollugat dán agis geat leat boahkuhuvvon Kárášjogas, muitala Boine.

Ii leat heahpat

Káre Máret oaivvilda ahte korona lea šaddan álbmotdávdan ja ahte ii galgga heahpanit dáinna.

Dát lea su mielas leamaš dehálaš muitalit, earret eará iežas nieiddažii Marie Kristinei gii lea isolašuvnnas dál.

Stuorimus hástalussan lea leamaš bágget nieiddaža geas eai leat dávdamearkkat orrut isolašuvnnas.

– Lea hui váivi. Go oainnát ahte nieiddažis eai leat dávdamearkkat ja su ferten doalahit eret mis. Dát ii leat somá, dadjá Káre Máret.

Máŋggaid beivviin lea 11 jahkásaš leamaš measta dušše iežas lanjas.

– Son lea hui čeahppi ja atná njálbmesuoji ruovttus ja diehtá ahte ferte leat várrogas, dadjá eadni.

Skuvla čuovvolan sin

Káre Máret lea hui duhtavaš čuovvolemiin maid bearaš lea vásihan skuvlla bealis.

– Skuvla lea leamaš hui čeahpit. Sii riŋgejit measta juohke beaivvi gullat movt manná, dadjá son.

Muđui ii leat bearaš váillahan maidege dán dilis mas leat. Buot orru mannan bures ja bearraša 11- jahkásaččas lea dušše leamaš veháš gosahat.

Dárbbašit veahki

Sátnejođiheaddji Svein Atle Somby lohká ahte gildii lea hástalussan dál go sin bargit buhcet.

– De lea eanet deaddu sidjiide geat leat dearvašat. Mii fertet ge ohcalit veahki olggobealde gieldda, dadjá son.

Gielda ii leat bidjan vel makkárge doaimmaid ja eai hehtte gieldda ássiid eallit nugo dábálaččat.

Pandemiijas ávžžuhuvvo čuovvut Álbmotdearvvašvuođa instituhta rávvagiid.