NRK Meny
Normal

Sivahallá sámi dáidára áitit

Journalista ii ádde manin olbmot eai oainne Anders Sunna dáidaga ja cealkámušaid áittan. – Livččii go buoret jos sensurerešin iehčan?, jearrá dáiddár ieš fástádussan.

Sápmi air force

«SÁPMI AIR FORCE»: Dat lea dán dáidaga namma, maid sámi dáiddár Anders Sunna lea hábmen.

Foto: Anders Sunna

Anne Grenersen

OHCALA REAKŠUVNNAID: Avisa Nordland-nammasaš áviissa journalista, Anne Grenersen.

Foto: Avisa Nordland

– Mun imaštan manne ii oktage ádde ahte dát eai sáhte leat eará go áitagat.

Nie cealká Avisa Nordland-journalista iežas kommentáračállosis.

Journalista Anne Grenersen čuoččoha ahte Anders Sunna dáidda, oktan Sunna cealkámušaiguin, fertejit áddejuvvot áittan (olgguldas čujuhus - dárogillii).

Gieskat almmuhii NRK guhkibuš dárogielartihkkala Anders Sunna ja su dáidaga birra, mas dáiddár čilge iežas radikála dáidaga.

Anders Sunna dáidda sisttisdoallá earret eará niibbit, bissut, bumbbát ja eará bávkkanasat. Dáid son áinnas seaguha sámi symbolihkain, nugo ovdamearkka dihtii sámeleavggain.

– Nuorra suhtus gánda

4 nation army

Anders Sunna dáidda.

Foto: Anders Sunna

Jos eará čeardda livčče ná dahkan, de livčče olbmot reageren dasa – nugo ovdamearkka dihtii islamisttat dahje olgešekstremisttat, oaivvilda journalista Grenersen.

– Muhto go sápmelaš ná dahká, de ii leat mahkáš mihkkige mas beroštit. Manne lea nu?

Journalista oaidná Anders Sunna «dušše nuorra suhtus gándan», muhto liikkáge ii galgga nu geahpadit tulkot Sunna dáidaga, oaivvilda Grenersen.

– Erenoamážit go jurddašit daid vásáhusaid maid mii oaidnit eará guovlluin ja birrasiin, gos veahkaválddálašvuohta lea neavvun leamašan ollašuhttit politihkalaččat, dadjá son.

Kunstverk av Anders Sunna

Anders Sunna dáidda.

Foto: Anders Sunna

– Stáhta ráhkada terroristtaid

Anders Sunna

RADIKÁLA DÁIDDÁR: Anders Sunna.

Foto: Martina Söderlind / Sameradion & SVT Sápmi

Dáiddár Anders Sunna ieš dadjá iežas guhkkin eret noaidin, ja lohká ahte ii han son dieđe mii boahtteáiggis geavaš.

– Muhto jos stáhta bealis jurddašit mo sii dulbmet unnitloguálbmoga ja rivvejit vuoigatvuođaid, de lea váralaš. Sáhttá áinnas dadjat ahte lea stáhta mii dagaha ahte šaddet terroristtat. Ja buot han sáhttá geavvat. Ii han olmmoš dárbbaš leat áššedovdi dan áddet.

– In han mun sáhte mearridit mo olbmot galget mu dáidaga tulkot, dadjá Sunna.

– Buoret jos sensurerešin iehčan?

Anders Sunna sin sjablong ved Kåfjordtunnelen

Anders Sunna dáidda. Dát geaidnogalba lea Sáhkkobátnetunealla lahka.

Foto: Geir Samuelsen / NRK

– Manne leat dus nu garra cealkámušat de?

– In sáhte eará sániid dadjat go iehčan sániid. Jos hilggošin iehčan sániid, de hilggošin maiddái iehčan dáidaga. Ja mii ulbmiliid dalle livčče dáidaga hábmet?, dadjá Anders Sunna.

– Ja livčče go ollu buoret jos sensurerešin iehčan ja iehčan dáidaga, ovdal go fuomášuhttit ahte dan maid stáhta dahká lea váralaš?, jearrá dáiddár retorihkalaččat.