Helikopterlihkohisvuohta Álttás – Njunušpolitihkkár massii bártnis

– Eallin lea nu mearihis eahpevuoiggalaš. Máŋga fiinna nuora, geain lei olles eallin iežaset ovddabealde, ja dál leat sii jávkan💔 Moai letne massán iežame boarraseammos bártni Kevin:a helikopterlihkohisvuođas, čállá Ronny Berg Facebook-siidustis.

Áltálaččat leat otne lossa morrašis maŋŋá lávvardaga ilgadis lihkohisvuođa. Helikopter gahčai go lei girdimin «Høstsprell» riemuid oasseváldiid Skoddevári guovllus.

– Álttá Ovddádusbellodat dovddaha čiekŋaleamos oktavuođadovddu buohkaide geat leat massán iežaset lagamusa. Soapmásat leat midjiide erenoamáš lagaš olbmot. Lise Lotte ja Ronny Berg leaba massán bártniska, čállá Álttá Ovddádusbellodat Facebook-siidustis.

Helikoptera mielde ledje vihtta nuorra rávisolbmo Álttás eret, ja vel ruođđelaš helikoptervuoddji. Buot guđas dušše.

Sihke Álttá Ovddádusbellodat ja Álttá Olgešbellodat leat bissehan iežaset válgagičču.

Bellodatjođiheaddji váldá oasis morrašis

Ruhtadoalloministtar ja bellodatođiheaddji Siv Jensen čállá son váldá oasis morrašis buohkain geat leat guoskkahuvvon helikopterlihkohisvuođas.

– Mun ja Ovddádusbellodat moraštat singuin ovttas, čállá son Facebookas.

Álttá sátnejođiheaddji, Bargiidbellodaga Monica Nielsen lea julggaštan morraša Álttá suohkanis. Álttá dearvvasvuohtaguovddážis lea ásahuvvon oapmehaččaid guovddáš, gos leat sihke doaktárat ja buohccedivššárat.

– Álttáservodat vásiha duođalaš lihkohisvuođas. Mu jurdagat mannet bearrašii ja ustibiidda, geat leat massán olbmuid geaidda sii leat buorit, dadjá Monica Nielsen NRK:ii.

– Dát lea ilgadis beaivi. Eaige gávdno sánit mat čilgejit dovdduidan. Dál galgat čájehit lieggasa ja doarjut sin geat gillájit lossa morraša. Dát lihkohisvuohta čuohcá garrasit báikkálašservodahkii ja dahká dan guhkes áiggi. Dál lea váldofokus daidda geat moraštit, lohká Nielsen.