Vuosttaš diehtu lihkohisvuođa birra bođii lávvardaga diibmu 17.06.
Garrasit roasmmohuvvan fárolaš sáddejuvvui lávvardaga Davve-Norgga universitehtabuohccevissui Romsii, muhto son jámii maŋŋelaš, muitalit politiijat otne iđđedis.
Lávvardaga diibmu 20.40 gávdnui dat maŋimuš olmmoš gii lei dieđihuvvon jávkan duššan. Dat mearkkaša, ahte buot guđas geat ledje fárus helikopteris mii gahčai Álttás lávvardaga leat duššan, čállá NRK Finnmárku.
Politiijat eai leat vel almmuhan duššan olbmuid namaid, muhto buot vihtta fárolačča galget leat veahá badjelaš 20-jahkásaš áltálaš nuora. Helikoptervuoddji lea ruoŧŧelaš.
Dát ambulánsahelikopter buvttii garrasit roasmmohuvvan olbmo Romssa buohccevissui lávvardaga.
Foto: Pål Hansen / NRKSoaitá ádjánit identifiseret duššan olbmuid
Statens havarikommisjon for transport dat oaččui dieđu lihkohisvuođas. Olbmot dán kommišuvnnas álget otne bargguin lihkohisvuođabáikkis.
Politiija rihkusteknihkkárat leat guorahallamin báikki, ja muitalit ahte sii leat ožžon Soahteveagas veahki helikopteriin fievrridit olbmuid ja veahkkeneavvuid lihkohisvuođabáikái.
– Gahččan helikopter lea nannosit buollán maŋŋá lihkohisvuođa. Danne navdet politiijat sii soitet ádjánit veahá áigge viežžat eret ja identifiseret duššan olbmuid, čilge Finnmárkku politiijaguovlu operašuvdnajođiheaddji Gunnar Øvergaard NRK:ii.
Lihkohisvuohta dáhpáhuvai Skoddeváre guovllus Álttá oarjenuorta guovlluin.
Eahpečielggas mii lea dáhpáhuvvan
«Høstsprell» musihkkariemut dollojedje dán vahkkoloahpa lahka lihkuhisvuođaguovllu.
Helitrans-helikopter dat girddii olbmuid várrái riemuid oktavuođas. Helitrans gullá Áltái. Beaivválaš jođiheaddji Richard Simonsen lohká NRK:ii, ahte sii leat garrasit bargamin dál gávnnahit mii dáhpáhuvai.
– In leat vel ožžon dieđuid das mii lea dáhpáhuvvan, muhto barggan dainna, muitala Simonsen.
Politiiját áigot gulahallat sihke vihtaniiguin ja Helitrans bargiiguin vai gávnnahivčče mii dáhpáhuvai.
– Soaitá ádjánit gávnnahit mii dáhpáhuvai, čuvgejit politiiját.
