– Giella dat gillá go massit skuvlla

Dát váruhus guoská daid suomabeal oahppiide mat Ohcejogas bohtet Sirbmái oktii váhkkus, go dáin leat veahá eará eavttut sámegiela dáfus go norgga beal mánáin, muitala Torkel Rasmussen.

– Suomabealde eai leat dákkár čielga sámeskuvllat go norggabealde. Sámegieloahppiidguin Ohcejogas lea sierra sámegieloahpahus, muđui lea oahpahusgiella suomagiella. Dát mearkkaša ahte ii gávdno dakkár čielga sámi arena gos mánát ja nuorat besset beare sámástit, ja dát gal váikkuha giela ovdáneapmái, čilge Rasmussen.

Rasmussen almmuhii guokte jagi dassái dutkamuša maid lei čállán doavttirbarggu olis. Dán čállosis son dutkkai Deanu ja Ohcejoga gielddaid skuvllamánáid sámegiela dili. Dutkkosis bođii juoga ovdan mii su oaivila mielde lea dehálaš dán áššis.

LOGA: Disputerte i dag

– Okta mii lea čielggas lea ahte Deanu gieldda nuorat máhttet sámegiela buorebut go suomabealde, ja dat geavahit maid dán eambbo. Danne lea dát ovttasbargu leamaš hui buorrin Ohcejohtmánáid- ja nuoraid giela ovdaneapmái. Dál mun balan ahte ášši šaddá nu go ovdal lei, ahte dat eambbo suomastišgohtet gaskaneaset.

Naba Sirpmá mánáid gielladilli?

Mo bajásšaddanguovddáža heaittiheapmi čuohcá Sirpmá mánáid- a nuoraid gillii, ii loga dutki sáhttit vástidit. Su dutkamušas ii boađe ovdan ahte leago makkárge erohus sámegielgelbbolašvuođas Sirpmá skuvllas ja Deanu Sámeskuvllas, mii jáhkkimis šaddá dáid skuvllamánáid molssaeaktun čavčča rájes.

LOGA: Dáppe eai galgga šat skuvllamánát viegadit

LOGA: Kan gjenåpnes dersom elevtallet øker

– Dasa in sáhte vástidit go mus ledje menddo unnán oasseváldit iežan dutkosis ahte dat logut sáhttet leat doallevaččat. Muhto dan mun gal sáhtan lohkat, dát ovttasbargu lea dieđusge leamaš vuoitun maiddái Sirpmá mánáid giellaovdaneapmái, go dáid oktasaš giella lea sámegiella.

Sirpmá skuvllamánáid sámegielgelbbolašvuođa nanuvuohta lea dovddusin maiddái politihkkáriidde, nugo Árjja Hartvik Hansenii, guhte lei okta dain gii jienastii bajásšaddanguovdddáža heaittiheami ovdii.

– Dan mun gal šállošan buot eanemusat dáinna áššiin, go dát mánát ja nuorat leat álo gártan sámegillii gulahallat ja dat lea ovddidan giela. Ja dat gal lea viehka čielggas ahte daid Sirpmá mánáidguin lea hui nanu sámegiella, ja dan ánssu gal galgá Sirpmá skuvla oažžut, nammalassii ahte dat lea leamaš nana buorre sámeskuvlan, loahpaha Hansen.