– Luste åarjelsaemiengïele Instagramesne lïeredh

Uktsie gïeleviehkie åarjelsaemiengïelem Instagramesne gåhtsajehtieh.– Domtem goh mijjieh vihkeles barkoem darjobe, Jonna Dunfjeld Mølnvik (17) jeahta.

Jonna Dunfjeld Mølnvik

Jonna Dunfjeld Mølnvik lea Gïeleviehkie Gielem Nastedh prosjektesne.

Foto: Ina Theres Sparrok

Gïelem Nastedh akte gïeleviehkie prosjeektem åtna, jïh Mølnvik lea akte dejstie mij lea meatan prosjeektesne. Dïhte sov vaajmoegïelem Instagramesne vuesehte, lustes videove jïh guvviegujmie.

Daate minngemes jaepien Mølnvik gïeleviehkine barkeme. Mølnvik ovmessie videove jïh guvvieh öörnedamme gusnie åarjelsaemien gïelem Instagramesne vuesiehtamme.

Naemhtie jeatjah aalmetjh guvviej tjirrh aelkebe maehtieh saemiengïelem lïeredh.

–Manne ovmessie baakoeh jïh tsiehkieh mov aarkebiejjeste gaavnem gusnie maahtam vielie saemiengïele nuhtjedh goh daenbiejjien.

Mølnvik tuhtjie luste dah maehtieh akte lustes sijjieh öörnedieh gusnie almetjh maehtieh åarjelsaemiengïelem lïeredh.

– Ij goh damtoes goh daate naan stoerre barkoe gosse gåetesne tjahkesjeminie, bene damtoes goh daate barkoe lea gaajh vihkeles læjhkan.

Tuhtjie hijven saemiengïelem sosijaale meediasne vuesiehtidh

Eivind Yrjan Stamnes (21) lea Gïeleviehkien Instagramkontoem akten jaepien dåeriedamme. Dïhte tuhtjie hijven dah Gïeleviehkie barkeminie åarjelsaemiengïele sosijaale meediasne vuesehte.

Eivind Yrjan Stamnes i kofte

Eivind Yrjan Stamned tuhtjie hijven saemiengielem sosijaale meediasne vuesiehtidh.

Foto: Privat

– Ij gujht mijjieh dan gellie åarjelsaemieh jïh dellie vihkeles mijjese gïelem ovmessie sijjesne gaavnedh jïh vuesiehtidh. Daaletjh dam Instagramesne dorjedh.

Stamnes jïjtje pryövoe saemiengïelem sosijaale meediasne nuhtjedh, jïh dïhte tuhtjie luste vielie lïeredh.

– Manne hov jïjnjh lïerem dah gïeleviehkeste jïh munnjan dïhte gaajh aevhkie.

Uktsie gïeleviehkie

Dæjman gosse Gïelem Nastedh prosjektine eelkie dellie nieljie Gïeleviehkie meatan. Dan jaepien uktsie Gïeleviehkie åådtjeme.

Britt Sparrok

Gïeleviehkien prosjekten åejvie Britt Sparrock.

Foto: Ristin Persson / NRK

Britt Sparrock mij lea prosjeekten åejvie jeahta dah numhtie dorjeme juktie dah sïjhth jïjnjebh noerh jaksedh.

–Dah noerh ovmessie nettverk utnieh, jïh gosse mijjieh uktsie gïeleviehkieh utnieh dellie vïenhtebe vielie noerh dan sisvegen åadtjoeh vuejnedh.

Sparrock håhkesje dah gïeleviehkie maehtieh viehkiehtidh saemiengïelem almetjidie lïeredh. Dïhte aaj vajtele noerh duestieh åarjelsaemiengïelem sosijaale meediasne nuhtjedh.