Sámi boarrásiidráđi jođiheaddji Inga Karlsen lohká dárbbu leat stuoris earenoamážit dearvvašvuođa- ja fuolahusfálaldagaid dáfus.
– Dálá ásahusain mii menddo dávjá vásihat ahte sis váilu sámi giella- ja kultuvrra máhttu ja áddejupmi. Dan oktavuođas oaidnit dárbbu ásahit sorjjasmeahttun ásahusa mii sáhttá buorebut áimmahuššat sámi boarrásiid beroštumiid, čilge jođiheaddji Inga Karlsen.
- Loga maid:
Boarrásat gárte fárret eará gildii
Stivrraláhttu Berit Ellen Nikkinen Varsi lohká ollu geavatlaš ovdamearkkat maŋimuš áiggis, mat duođaštit dárbbu sierra sámi boarrásiidáittardeaddjái.
Earret eará son čujuha dasa mii dáhpáhuvai Kárášjogas borgemánus. Kárášjoga boarrásiidsiida lei nu dievva ahte gárte sáddet muhtun boarrásiid Detnui.
– Go gielda sáddešgohtet boarrásiid vierisgildii, de dat lea hui issoras. Ášši ii guoskka dušše sutnje guhte gártá fárret, muhto maiddái lagamušaide. Dákkár dili eat sáhte dohkkehit, čilge Nikkinen Varsi.
Sámi boarrásiidáittardeaddji galgá leat maid sámi boarrásiid sáhkaguoddi ráđđehussii ja eará njunuš eiseválddiide Varsi ja Karlsen čilgeba.
Dáhttu veahki sámediggeráđis
Boarrásiidráđđi áigu dál čavget suittehiid, ja dáhttut maiddái sámediggeráđi eambbo áŋgiruššagoahtit ášši ovddas.
– Mii diehtit ahte sáhttá gollat olu áigi ovdal go min gáibádus ollašuvvá. Muhto eat sáhte vuollánit. Mađi eambbosiid oažžut beroštišgoahtit áššis, dađi johtileabbo sáhttit ollašuhttit ulbmila, čilge Karslen.
Lohpida iskat dárbbu
Sámediggeráđđi Henrik Olsen lohpida čuovvolit ášši.
– Fertet vuos veahkkálagaid boarrásiidráđiin gávnnahit makkár dárbu dása lea, ja mo dan sáhtášeimmet čuovvolit, vástida Sámedikki ráđđelahttu Henrik Olsen.
Earenoamážit dearvvašvuođaásahusain su mielas lea leamaš dávjá vásáhusat mat čájehit dárbbu sierra sámi boarrásiid-áittardeaddjái.
– Boarrásiin lea dávjá váttis gulahallat dan geažil go doaktárat ja divššárat eai hálddaš sámegiela. Mii ferte oažžut buoret vuogádagaid mat áimmahuššet dákkár dárbbuid, Olsen lohká.