Emil Kárlsen lávllui ráfilávlaga ruoššagillii

– Mun čállen dien lávlaga ovttas Ruošša beale skihpáriin. Dat šattái proteastalávllan Ukraina-Ruošša soađi vuostá, čilge Emil Kárlsen NRK Sápmái.

Lávlla «Min áiggis - Ближе, чем кажется» máidnu ráfi ja cuiggoda soađi.

– Mii fertet suodjalit min máilmmi ja doallat min máilmmi gieđas. Dat mearkkaša suodjalit dan. Dáhpáhusat leat lagabut go dan maid mii jáhkkit. Fertet respekteret nuppiideamet ja guldalit nuppiideamet, ávžžuha Kárlsen.

Kárlsen šattai fáhkka ráhkkanišgoahtit čuožžut Riddu Riđu lávddi alde go bođii diehtu, ahte Katarina Barruk ii sáhttán boahtit.

– Slava Ukraini

Njeallje ovttaskas Ruošša bealde sápmelačča oassálastet dan jagi Riddu Riđus.

Sii leat hirbmat ilus go sápmelaš násti gudnejahttá sin lávlagiin ruoššagillii.

– Dat lea áibbas buorre. Mun liikon go son lávlu, ahte mii buohkat leat vieljat ja oappát. Mii sápmelaččat gullat seammá bearrašii. Mii eallit Norgga, Suoma, Ruoŧa ja Ruošša bealde. Dát lávlla lea nu fiinnis ja Emil lávlu áibbas buori ruoššagillii, deattuha Bolšunov.

– Munnje mearkkaša olu gullat dan. Mun lean hui giitevaš dasa ja anán árvvus gullat dan. Hui somá gullat. Sávan soahti fargga nohká. Slava Ukraini (Gudni Ukrainai), lohká Kárlsen.

– Dát lávlla lea hirbmat fiinna skeaŋka midjiide Ruošša beale sápmelaččaide. Mii eat leat nu gallis dáppe Riddu Riđu, dušše njealjis, čilge Bolšunov.

Almmuhan skearru

Emil Kárlsen (25) lea bajásšaddan Čávkkusis Omasvuonas, muhto ássá Romssas.

Son lei Resirkulert nammasaš joavkku lávlu ja gitárista.

Son lei Riddu Riđu jagi 2019 nuorra artista.

– Váivi go Katarina Barruk ii boađe. Dá lei okta konsearttain masa mun áigon. Seammás lea somá go fas beasan čuojahit dáppe Riddu Riđus, lohká Kárlsen.

Diibmá almmuhii Emil Kárlsen skearru «Nagirvárrái» ovttas artisttain Lávre. Lávre lei bearjadaga konsearttas mielde lávddi alde moadde lávlaga lávlumin.

Lávlla «Min áiggis - Ближе, чем кажется» lea skearrus.