Ella Marie unnaoappáš: – Go jienastit, de láve váibmu julkit

– Mun lean hui balus ahte son šaddá eret ja go jienastit de láve váibmu julkit. Hui issoras muhto hui somá, lohká Ayla Iselin Hætta Isaksen.

Otná eahkedii son gal illuda.

– Jus Ella vuoitá de lea hui somá, muhto jus ii, de aŋkke lea beassan nu guhkás. Dat lea beare somá.

Unnaoappáš lea hui rámis.

– Ii oktage leat dego Ella. Son lea ieš, nu earenoamáš. Mun lean nu rámis go lea ollen nu guhkás, dat lea veahá ártet nai.

Skuvlaviellja movttet

Junne Solbakk Anti (21) lea Ella Marie ovddeš skuvlaviellja. Soai leaba Deanu sámeskuvllas stoagadan. Anti lea čuvvon Ella Marie dáin gilvvuin.

– Dieđusge lean čuvvon. Dat han lea deatnulaš ja mii han gal doarjut su. Ella Marie lávii nuorabun jo leat hui buorredáhtolaš olmmoš.

– Mus lea buorre dovdu, eai leat sánit. Dat lea somá, njulgestaga somá, lohká son.

Son muitala ahte áigu geahččat finála olbmáiguin fárrolaga.

– Mun gal nu illudan ihttážii geahččat finála ja lea bággu jienastit. In dieđe man olu lean golahan dássážii, boagusta son.

Telefovdna galgá báhkkanit

Deanu sátnejođiheaddji Frank Martin Ingilæ lea čuvvon deanonieidda guhká.

– Buohkat Deanus ja olles Sámis leat nu govdadat Ellain, son lea nu čeahppi. Jurddašeaddji ja duođai čeahpes nieida.

Sátnejođiheaddjis eai leat logut man olu lea jienastan Ella.

– Áiggun jienastit dassážiigo telefovdna báhkkana, lohká son.

Lágidit «Glam» eahkeda

Kulturskuvlla rektor Ebba Joks lea ráhkkaneame čájehit finála stuorašearpmas Deanu birasvisttis. Sis galget doalut. Áigot gáhkuid guossohit ja geahččat finála.

– Mun lean nu ilus go Ella Marie lea šaddan ođđa jiellahin olles sámi álbmogii. Šaddá hui somá ja mun sávan hui oallugat bohtet birasvistái ávvudit minguin. Doppe galget muoiddut ja «glamour». Hástalan olbmuid coggat šealgu biktasiid vel badjelii.