Elin Oskal (25) la ådå sáme BlimE-artissta

Les på norsk.

Artissta ja Jikŋon-oavdástalle Elin Kristina Oskal Sáltoduoddaris Nordlándas la jiedna dán jagásj sáme versjåvnån dán prosjevtan.

Sån miedet sån la mælggadav sávvam rållav oadtjot BlimE-artisstan.

– Gå gatjáduvviv sæbrrat, de sjaddiv diedon riek måvtugis. Dat lij vehi iehpedádjadahtte, subtsas sån.

BlimE la NRK Supera nasjåvnålasj ratjástibme aktisasjvuoda diehti ja givsedime vuosstáj.

• Lågå aj: Are (18) iesj girjev jårggålij gå gielanis ittjij desti girjijt gávna

Aktak i galga ålgoduvvat

Anna Tollan la sáme versåvnå prosjæktajådediddje. Sån subtsas ulmme BlimEajn la vuosedit divna li niddo buorre ja sierralágátja, ja aktak i galga ålgoduvvat.

Konsæppta l nav vaj divna máná Vuonan galggi aktisattjat dánsav ja lávllagav oahppat mij aktisasjvuodav gaskos.

– Jus vuojná soames la ålggolahán, de máhtá lávllagav jali dánsav doajmman adnet divnajt sebrudahtátjit,diedet Tollan.

Ávvo, lávla ja dánssa

Åvdep jage BlimE ásaduváj lågåt bále, ja dalllutjis sjattaj rijkajgasskasasj.

Lassen lij vuostasj bále dát populære konsæppta sábmáj bådij, Vegard Bjørsmoan artisstan.

Tollana milta galggá BlimE juohkka jage givsedibmáj tjalmostit, ja divnajt mujttádahttet sebrudahttem la ájnas.

Dat mij la buorre le gå ávvo, lávla ja dánsa baktu dagáduvvá.

– Vájbi álkkep la dav mujttet gå la dan dille sinna soames ålgoduvvá, javllá Tollan.

Vuojnnám gåk vájkkut

Elin Oskala mielas BlimE la buorre konsæppta mij ájnas sisanov åvdet. Sån la iesj ájttsam makkir vájkkudus la mánájda ja nuorajda.

– Mån lav skåvlån guokta jage barggam ja lav nav ålov BlimE-lávllagij birra gullam, ja oahppijn vuojnnám gåk dat sijáv vájkkut.

Oskal la vásedam máná li aktan lávllum ja dánssam, ja dassta de buorre aktisasjvuohta ásaduvvá.

– Muv mielas la riek ájnas ja riek fijnna vásádus. Ja gå mån bessav liehket dat artissta dán jagá dat la riek stuorra guddne munji, javllá Oskal.

• Lågå aj: Geldulasj ietjá lahkáj sámij birra subtsastallat

Dåbddåt ietjas ietjálágátjin

Bajássjattadattijn lij Elin Oskal ájnná sáme oahppe klássan, ja ájnná oahppe ællosujtofámiljas. Dat dagáj vaj sån soames bále dåbdåj ietjas vehik ålggolahán.

– Mån jáhkáv divna li dav soames bále vásedam, unnán ietjálágátjin liehket, jali vehi aktu, jali vehi unnogis, tjuottjot Oskal.

Suv mielas konsæppta dagu BlimE luluj liehket stuorra viehkken sunji mánnán. Danen la sierralágásj mávsulasj prosjæktaj oassálasstet.

– Ájnnasamos máná lavllagij, dánssaj ja musihkkavideoj lijkkuji. Dat la má mánájda, javllá Oskal.

Riekta válljim

Dán jagásj sáme artissta lij buorre mærrádus BlimEaj, tjuottjot prosjæktajådediddje.

– Elinin li da sæmmi árvo dagu BlimE. Besa gal liehket guhti le. Niddo liehket ij la juoga massta galga givseduvvat, dættot Tollan.

Tollan tjielggi Elinin iesj li vásádusá gåktu ietjálágátjin dåbddåt nav vaj sån dan diehti dåbddå BlimEa ulmev sierralágásj ájnnasin.

– Tjielggasit dat lávllagin gullu, ja gåktu sån barggá, tjielggi Tollan.

Dán jagásj Vuona artissta l Nicolay Ramm, guhti Oskala láhkáj galggá musihkkavideoj sæbrrat dán jagásj lávllaginm.

Musihkkavideo ja lávla almoduvvá bårggemáno 13. biejve.

• Lågå aj: Ávon gå New Amigos julevsámegiellaj boahtá
• Lågå aj: Hedres med eget minnesmerke: – En krigshelt