Gulldala ássjev Julevmagasijnan dánna.
Dålusj sáme ræjdo li sunji viehkken gå sáme histåvråv galggá åvddånbuktet. Dat vuohke vuojnnet uvsajt rahpá nuorra ulmutjij vájmmuj.
– Munji lij suohtas ja geldulasj histåvrråj gulldalit mav iv la åvddåla åvvå diehtám. Duodden aj ådå bivddemvædtsagav gæhttjalam. Ja mån lav dájna riek ålov oahppam. Dát lij juoga mij lij ietjá lahkáj gå ieme skåvllåbiejvve, ja dat lij de geldulasj.
Dav subtsas dudálasj lågåtklássak Ájluovta skåvlån Hábmerin Erika Thomassen Sjo guhti de maŋemus skåvllåvahko besaj histåvrråtijmmaj oassálasstet gånnå duodjár ja juovsadahkke Geir Anders Hætta Berg lågådaláj ja vuosádaláj.
Kultuvrav gåtsedit
Oahppe nuorajskåvlån Ájluovtan gulldalin snivva gå Hætta Berg subtsastaláj sáme histåvrå birra, ja bivddemvuogij birra ma lidjin dålen.
Maŋen sujna lij guovtemuorak sáme juoksa, ja aj njuola majna de oahppe histåvråtijma maŋŋela oadtjun vuohtjet.
Geir Anders Hætta Berg javllá ájnas la dajt åsijt sáme kultuvras gåtsedit mav lij massám.
– Ájnas la vas dav ruoptot válldet, dagu juovsajt dahkat ja dajna vuohtjet, ja aj subtsastit gåktu sáme lij viessum ja gåk lij rijbbam. Sábme l má dåbdos ålles væráldin tjiehpes tjuojggen, tjiehpes vanntsadahkken ja juoksadahkken, ja aj tjiehpes vuohttjen.
Lågå aj:
Juoksáhkká lij dal akta sáme jubmelijs, ja sån lij riek ájnas jubmel guhti de mierredij guhti galgaj sjaddat tjiehpes vuohttje. Ja væráldin aj gulluj vaj sámij gaskan lij nissun maŋen bivddemin, ja lij juovsajn vuohtjemin.
– Dajna de dassta poengav dahkin gå nissun lij maŋen bivddemin. Valla sábmelattjaj lij dal dát luondulasj. Ietjá kultuvrajn dájn mijá lahkusijn ij lim nav luondulasj. Dajna de dassta sáhka sjattaj, subtsas Hætta Berg.
Cool ulmusj
Geir Anders Berg tjuottjot sáme juovsa lidjin buoremusá.
– Dav de vikinga subtsastin. Ja finnboga lij dal buoremus, javllá Hætta Berg ja vuoset aj dan sæmmi javllamusán Islanda åvdep presidænntaj mij dav namáv guottij.
Geir Anders Hætta Berg la ávon gå bæssá nuorajda sáme histåvrå birra dán lahkáj lågådallat. Sunji vuojnnet oahppe lijkkuji dav gullat, ja Hætta Bergaj dåbddu dát la ájnas barggo.
– Dat aj vaddá ienep iesjdåbdov sábmelattjajda. Sij lj sábmelattja, ja sábmelattja lij riek tjiehpes ulmutja, ja dát la cool oasse sáme histåvrås. Sábmelasj lij má cool ulmusj, ja ællim dal nav primtiv gåk lip jáhkkám.
Lågå aj: