Hans Petersen lea hui ilus go dievdu dál lea dubmejuvvon. Son válljii váidit dán neahttacielaheami sápmelaččaid vuostá.
Son lohká NRKii ahte dát vuoitu gullá buot sápmelaččaide ja ahte dát addá sutnje vel eanet návccaid bargat dainna ahte eastadit vaši sápmelaččaid vuostá.
Doaivva boahtte áigái
– Mu mielas lea illudahtti ja dárbbašlaš ahte eastadit dan almmolaš nuoskkideami, mii lea go cielahit ja vealahit olbmuid interneahta bokte. Nu lohká sámediggeráđđelahttu Silje Karine Muotka.
Sámediggeráđđelahttu rámida Hans Petersen go váiddii dán ášši.
Foto: NSRSu mielas lea hui dehálaš ahte neahttavaši dihte dubmejuvvo.
– Dat lea dieđusge dehálaš dan hárrái ahte de mis lea čielga ovdamearkkat ahte leat váikkuhusat ja ahte sáhtát ráŋggáštit du jus čálát dakkáriid mat leat čearddalaš vealaheapmi ja njulgestaga cielaheapmi ja rasisttalaš, lohká son.
Muotka lea ilus go Hans Petersen váiddii dán ášši.
– Dát ášši ii noga dása ahte duopmu lea celkon, muhto dál lea boahtán duopmu mii váikkuha sullasaš duomuin boahtte áiggis, lohká son.
– Mu mielas dat lea buorre ja sáhttá buktit doaivaga ahte almmolaš digaštallan buorrána, lohká Silje Karine Muotka.
Stuora vuoitu
Jurista Ande Somby lohká dán duomu stuora vuoitun.
– Mun jáhkkan dát lea vuoitun olles Norgga servvodahkii, dat ahte min servvodat ii galgga leat báidnojuvvon cielahemiin ja soaibmamiin. Dat lea guhkit áiggi vuollái buorre midjiide buohkaide geat eallit dán servvodagas, muhto dat lea maid dieđus ilolaš jus geahččá dan sámi geahččansajis.
Jáhkkatgo ahte eambbosat dubmejuvvojit dákkár áššiin?
– Mun jáhkkan ahte sápmelaččat leat dál lihkkan ja bohtet eambbo váidagiid sáddet dákkár áššiiguin. Ja jáhkkan ahte áššáskuhtti eiseváldi lea dál čuoigan lahtu ja duopmostuollu lea dál dan duođaštan. Nu ahte mun navddán ahte dál boahtá okta áigi gos diekkár áššit bohtet eambbo oidnot. dadjá Somby.
