Muotka, geas Sámedikkis lea politihkkálaš ovddasvástádus oahpahusáššiin, áigu ieš ođđajagis iskat makkár dat duođaid lea ášši go Deanu gielddastivrra eanetlohku mannan váhkus mearridii heaittihit Sirpmá bajásšaddanguovddáža.
LOGA:
– Mun gal áinnas vuolggán Detnui gulaskuddat, ja jus bovdehus ii bođes doppe válddán ieš oktavuođa, lohká Silje Karine Muotka.
Mearrádus ii lean ruđaid duohken
Ii leat váhkku ge gollan das rájes go almmuhuvvui ahte čavčča rájes giddejuvvojit oahpahusuvssat Sirpmás. Mearrádusa vuođđun čilgii Árjja Hartvik Hansen máŋggabealalažžan.
– Dat lea dat duohta dilli nu ahte mánná ja ohppidlohku lea nu vuollin doppe ahte ii leat šat vejolaš doallat skuvlla. Dasa lassin šattai mannan čavčča vel váddát go masiimet nuoraidskuvllaoahppiid Deanu Sámeskuvllii, go nuoraidskuvllaoahpaheaddji ii lean gávdnamis Sirbmái.
Gieldda ruhtadili gal biehttalii Hansen leat sivvan heaittiheapmái.
– In mun muitte juste man olu gielda seastá dáinna, sullii 3.000.000 jahkái. Ii dás leat dat seastin mii lea dat váldu, baicce dat ahte jus skuvlla galggaš doallat de doppe galgá leat buorre dilli sihke bargiide ja oahppiide. Jáhkan ja doaivvun skuvllamánáid movttáskit go Deanu Sámeskuvllii besset, go dat skuvla gal doaibmá bures, muitala Hansen.
Dehálaš ovttasbarggu šálloša
Sirpmá skuvlla ovttasbargu Ohcejoga skuvllain, man váhnemant ja gielladutki rámidit bures doaibman, ii lean gielddastivrraeanetlogu mielas doarvái doalahit bajásšaddanguovddáža. Dát lea šallušahtti Muotka mielas, gii lea maid viidát rápmon dán ovttasbargoprošeavtta.
– Sámedikki bealis leat mii mángii ovdanbuktán, maiddái našunála čoahkkimiin, dán prošeavtta buorrin ovdamearkan das ahte man bures riikkarájáid rastá sáhttá ovttasbargat.
LOGA:
Váikko Muotka ii loga diehtit nu olu dán ovttasbarguprošeavttas, namuha son guit máŋga buori beali ovttasbarguprošeavttain man ii háliidivčče dál duššás mannat.
– Dákkár prošeavttaid bokte nannejuvvo sámevuohta, dasa lassin sáhttit mii norggabealde oahppat daid buriid beliid mii suoma skuvllavuogádagas lea.
Evttohan oktasaš skuvlla
Suomabealde árvalii Kati Eriksen čovdosa áššái, nammalassii oktasaš sámeskuvlla cegget. Dát livččii de loktet mánáid ja ohppidlogu. Dán ii jáhke sámedikkiáirras Muotka veadjemeahttumin.
– In mun livččii muđuid politihkket jus in livčče jáhkkit vejolašvuođaide, ja áinnas boađán Detnui suokkardit ášši ovttas Deanu gielddain ja suoma skuvllaeisseváldiin, go daid duohken dat loahpas šaddá ášši. Sámedikkis ii leat makkárge mearridanváldi dás, muhto politihkkálaš dásis sáhttit geahččalit váikkuhit ovdamearkkadihte gulahallama bokte, loahpaha Muotka.