Ballet heajos suoidnešattu dagahit heahtedili

– Vearrámus mii sáhttá geavvat, lea ahte boanddat šaddet njuovvat elliid go ii leat doarvái borramuš, muhto mun sávan ahte mii eat gártta dan dillái gal, lohká Finnmárkku boanddaid searvvi jođiheaddji Lise Kaldahl Skreddernes.

Guovdageainnus lea boanda Jon Evald Hætta geargan lájuiguin ja čohkken suoidnespáppaid náveha lusa Ávžžis. Dán jagi eai gártan nu olu spáppat go lávejit.

– Dán geasi lea oba heittot suoidnešaddu leamaš, lei guhkes dálvi ja bođii hui goikegiđđa, mii dagahii ahte álggii maŋŋit šaddat, dadjá Hætta.

Son muitala alddis 30% unnit suoinni go dábálaš jagiid láve. Diibmá sus ledje 750 suoidnespáppa go gearggai lájuiguin. Dán jagi eai leat eará go 450.

– Mun gal birgen, muhto in sáhte vuovdit suinniid eará boanddaide ja boazodolliide nu go láven, dadjá Hætta.

• Loga: Boazobargi: – Cagget min siidda gassamuohttagii jápmit

Sávvá ahte ii šatta heahtedilli

Finnmárkku boanddaid searvvi jođiheaddji Lise Kaldahl Skreddernes muitala ahte olu boanddat leat dál fuolastuvvan heajos suoidnešattu geažil.

– Man vearrái dilli lea ii dieđe vel áibbas sihkkarit ovdal go buohkat lea geargan lájuiguin, dadjá son.

Son muitala ahte muhtin guovlluin leat guhkes dálvi ja goikegiđđa billistan gittiid, maid boanddat leat ođđasit šaddan gilvit, ja dáid eai leat vuos láddjen.

Ii leat gal seamma heittot juohke sajis, ja Skeddernes sávvá ahte ii šatta heahtedilli ealáhusas.

Son lea gal sihkkar ahte olu boanddat šaddet oastit suinniid go iežaset gittiin ii leat doarvái buorre šaddu.

– Vearrámus lea jus Davvi- Norgga boanddat eai juollut vuovdit, de ferte Lulli-Norggas diŋgot suinniid ja de gal sáhttá jođánit gártat divrrasin, čilge Skreddernes.

• Loga: Badjel čuođi bohcco jápmán roasu geažil

Oallugat háliidit oastit suinniid

Guovdageainnu boanda Jon Evald Hætta láve juohke jagi vuovdit suinniid sihke eará boanddaide ja boazodolliide.

Son muitala jo ožžon olu telefovnnaid Álttá boanddain, geat áiggoše oastit suinniid.

– Álttás lea hui heittot , doppe lea oallugat geain leat giettit billahuvvan giđđat, ja dat eai leat oba šaddange dán geasi, muhto mun in sáhte vuovdit ovdalgo dieđán ahte birgen ieš.

Sus leat báhcán olu suoinnit diimmážis. Ovtta guorbmebiilla dievva lea jo sádden Áltái. Reastta lea šaddan vurket iežas omiide vai dain lea doarvái suoidni dálvái.

• Loga maid: Ođđa rap-lávlagat riegádit goavvedálvvis