Ođđa rap-lávlagat riegádit goavvedálvvis

Loga ášši dárogillii.

– Dán dálvvi lea leamaš váttis oažžut doarvái áiggi buot iežan bargguide. Dávjá lea oalle hušša, muhto olbmos han álo lea áigi dasa masa liiko eanemus. Dalle šaddá áigi musihkkii maid, čilge Mihkku Laiti NRK:ii.

Cuoŋománu 16. beaivve almmuha son Spotify ja iTunes bokte ođđa lávlagiid artistanamain Yungmiqu.

Nuorra almmái ássá Ohcejogas Suoma davimusas. Son lea ieš čállán sániid, ráhkadan musihka ja čuojahan duogášmusihka buot iežas rap-lávlagiidda.

– Ovtta lávlaga lean čállán guohtunroasus. Das muitalan mo mun vásihan dán. Dát lávlla ii leat vel almmuhuvvon, muitala Laiti.

– Erenoamáš dálvi

Njukčamánu gaskamuttos celkkii Norgga eanandoalloministtar, boazodoallu vásiha goavvedálvvi gassa muohttaga geažil. Dan maŋŋá lea juolluduvvon olu ruhta gáhttet bohccuid mat nelgot.

Suoma beale bohccuin lea maid leamaš váttis gávdnat doarvái ealáha.

– Olu muohttaga geažil leat bohccot heajos vuoimmis. Dat illá nagadit lihkadit ja danne leat mii ferten biepmat daid masá olles dálvvi. Váttis gal lea, muhto miihan gal birget, dajá Mihkku Laiti movttegit.

Mihkku lea studeantan Ohcejoga Musihkkaakademiijas, seammásgo son maid vázzá logahaga doppe.

Su áigomuš livččii studeret viidáset dovddus musihkkaakademiijas Helssegis ja šaddat musihkkárin.

– Koronaroasu geažil lean šaddan studeret ruovttus. Akademiija livččii maid galgan doallat konsearttaid, muhto dáin áddemis ii leat šaddan mihkkige, muitala Laiti.

Čuojaha máŋga čuojanasa

Mihkku čuojaha sihke bássagitára, gitára, piano, rumbbuid ja klarineahta. Eanaš musihka iežas lávlagiidda son almmatge ráhkada iežas dihtoriin.

– Dušše ovtta lávlagii lean čuojahan «albma» čuojanasaiguin. Soapmasit várra oaivvildit mun lean čeahppi lávlut, muhto in dieđe man duohta dat leaš, árvala Mihkku ja bohkosa.

Mihkku Laiti musihkalaš ovdagovat lea sápmelaš rappejeaddji Amoc ja suopmelaš rappejeaddji Pyhimys.

– Pyhimys lea erenoamáš. Son čállá teavsttaid vaikko man birra. Muhtimiin politihkas ja muhtimiin gis eallima hástalusain. Dáid son gaskkusta erenoamáš buori vuogi mielde.

Mihkku eadni, Annukka Hirvasvuopio-Laiti, lea maid alladási musihkkaoahpu gazzan ja son lea dovddus lávlu. Son mearkkaša olu bárdnásis.

– Mun lean leamaš su mielde konseartamátkiin jo dalle go ledjen lihpariin ja son lea munnje buorre ráđđeaddi. Su beroštupmi musihkkii movttiidahttá ja illudahttá mu, čilge Mihkku Laiti.