Åvdep bargge Árranin dåbddi biehtedum ja nuppástum
Guovtes gudi árabu bargajga julevsáme guovdátjin Árranin bukteba garra lájtov guovdátja jådediddjijda. Gry Fors Spein varudallá sån biehteduváj madin Lis-Mari Hjortfors dåbddå degu sjáhtjaluváj ietjas bargos.
– Mån nåv suhttiv, valla ienemusát hådjåniv gå dádjadiv lidjiv biehteduvvam, giehttu Fors Spein (64) NRKaj.
Lis-Mari Hjortfors (69) skihppáj, tsåhkehávve sjattaj. Sån giehttu NRK jáhkká ilá ållo barggo sjattaj.
– Rassiduvviv ja iv jáhke rumáham dav gierddam.
Goappátjagá libá sieldes lájttálisá gåktu dallusj direktørra Árranin Lars Magne Andreassen dåmadi sunnu guokáv.
NRKa la åvdebu låktim ássjev gåktu mánájgárdde tsieggidahttem hiejteduváj konkursajn ja iehpeluohtádusájn Árrana vuosstáj.
Dan ássjen ilmij Stiftelsetilsynet tjoahkkájgæsosav mij javlaj guovdásj måttijt jagijt juo lidjin vádnum økonomijajådedidmev.